പത്തനംതിട്ട : ലോക്ക് ഡൗൺ മൂലം ആശുപത്രികളിൽ പോകാൻ പൊതുജനങ്ങൾ ബുദ്ധിമുട്ടുന്ന സാഹചര്യത്തിൽ വീട്ടിലിരുന്ന് ഡോക്ടറുടെ സഹായം തേടാം. ഇതിനായി 'ഒപ്പം ഡോക്ടർ ഓൺലൈൻ' എന്ന വെബ്‌സൈറ്റ് ആവിഷ്കരിച്ചു. മെഡിക്കൽ ഓഫീസേഴ്‌സ് അസോസിയേഷനാണ് പദ്ധതി തുടങ്ങിയത്. ഏത് വിഭാഗത്തിലെ ഡോക്ടറെ ആണ് ബന്ധപ്പെടണ്ടതെന്നു തിരഞ്ഞെടുത്തതിനുശേഷം ആവശ്യമായ വിശദാംശങ്ങൾ നൽകി തീയതി തിരഞ്ഞെടുത്തു കഴിഞ്ഞാൽ ഡോക്ടർ ഫോണിൽ ബന്ധപ്പെടുകയും വേണ്ട നിർദ്ദേശങ്ങളും ഓൺലൈൻ വഴി മരുന്നുകളുടെ കുറിപ്പും നൽകും. . kgmoapta.com എന്ന വെബ്‌സൈറ്റിൽ 'ഒപ്പം' എന്ന ലിങ്കിൽ ക്ലിക്ക് ചെയ്യുമ്പോൾ ജില്ലയിലെ വിവിധ ഡോക്ടർമാരുടെ പേരുകൾ കാണാം. എല്ലാ സ്‌പെഷ്യാലിറ്റി വിഭാഗങ്ങളുടെയും പൊതുജനാരോഗ്യ മേഖലയിലെ ഡോക്ടർമാരുടെയും പ്രാഥമികാരോഗ്യ കുടുംബാരോഗ്യ കേന്ദ്രങ്ങളിലെ ഡോക്ടർമാരുടെയും സേവനം ലഭിക്കും.. ജില്ലയിലെ സർക്കാർ മേഖലയിലെ എഴുപതോളം ഡോക്ടർമാരുടെ സേവനം ഇതുവഴി പൊതുജനങ്ങൾക്കു പ്രയോജനപ്പെടുത്താം. 'ഒപ്പം ഡോക്ടർ ഓൺലൈൻ' എന്ന വെബ്‌സൈറ്റിലൂടെയുള്ള ഓൺലൈൻ ബുക്കിങ്ങ് സംവിധാനം ജില്ലാ കളക്ടർ പി.ബി നൂഹ് ഉദ്ഘാടനം ചെയ്തു. ജില്ലാ മെഡിക്കൽ ഓഫീസർ ഡോ.എ.എൽ ഷീജ, എൻ.എച്ച്.എം .ഡി.പി.എം ഡോ.എബി സുഷൻ, കേരള ഗവൺമെന്റ് മെഡിക്കൽ ഓഫീസ് അസോസിയേഷൻ പത്തനംതിട്ട ജില്ലാ പ്രസിഡന്റ് ഡോ. എസ്. ജ്യോതീന്ദ്രൻ, ജില്ലാ സെക്രട്ടറി ഡോ. ടി. പ്രവീൺ, ട്രഷറർ ഡോ. ഹരികൃഷ്ണൻ, വനിതാ വിങ് സെക്രട്ടറി ഡോ.ബെറ്റ്‌സി വി. ബാബു, ജോയിന്റ് സെക്രട്ടറി ഡോ. ശ്രീകുമാർ, ഡോ.എസ്. ഗിരീഷ്, ഡോ. ശ്രീജിത് ബാബു തുടങ്ങിയവർ പങ്കെടുത്തു.