പത്തനംതിട്ട : കൊവിഡ് 19 സാഹചര്യങ്ങളുടെയും പൊതുനിയന്ത്രണങ്ങളുടെയും പശ്ചാത്തലത്തിൽ ജില്ലയിൽ നിരീക്ഷണത്തിലുള്ളവരുടെയും മറ്റുള്ളവരുടെയും ആവശ്യങ്ങൾ അറിയിക്കുന്നതിനും ആശങ്കകൾ പരിഹരിക്കുന്നതിനുമായി ജില്ലാ ഭരണകൂടത്തിന്റെ നേതൃത്വത്തിൽ ഐ.വി.ആർ (ഇന്റഗ്രേറ്റഡ് വോയ്‌സ് റെസ്‌പോൺസ്) സംവിധാനം ആരംഭിച്ചു. പത്തനംതിട്ട ജില്ലയിലാണ് സംസ്ഥാനത്ത് ആദ്യമായി ഈ സംവിധാനം നിലവിൽ വരുന്നത്. 9205284484 എന്ന നമ്പരിൽ വിളിച്ച് ജനങ്ങൾക്ക് ആവശ്യമുള്ള സേവനങ്ങൾക്കായുള്ള ഓപ്ഷനുകൾ തിരഞ്ഞെടുക്കാം. കൊവിഡ് 19നുമായി ബന്ധപ്പെട്ട കൺട്രോൾ റൂം സേവനങ്ങൾ, മാനസികാരോഗ്യ സേവനങ്ങൾ, മരുന്നുകളുടെയും മറ്റ് അവശ്യ വസ്തുക്കളുടേയും സേവനങ്ങൾ എന്നിവ ഇതിലൂടെ ലഭ്യമാകും. ഐ.വി.ആർ വഴി ലഭിക്കുന്ന ആവശ്യങ്ങൾ, ബന്ധപ്പെട്ട തദ്ദേശ സ്ഥാപനങ്ങൾക്കു കൈമാറുകയും പരിഹരിക്കുന്നതിനുള്ള നടപടികൾ സ്വീകരിക്കുകയും ചെയ്യും. അടൂർ ആസ്ഥാനമാക്കി പ്രവർത്തിച്ചുവരുന്ന ടീൻ ടെക്കീസ് പ്രൈവറ്റ് ലിമിറ്റഡ് എന്ന ഐടി സ്റ്റാർട്ട്അപ് സി ഇ ഒ ഷിയാസ് മുഹമ്മദ് സുനിൽ, ഡൽഹി ആസ്ഥാനമായി പ്രവർത്തിക്കുന്ന മൈ ഓപ്പറേറ്റർ എന്ന കമ്പനിയുമായി സഹകരിച്ചാണ് ഐ.വി.ആർ നിർമ്മിച്ചത്. 80 പേർക്ക് ഇവയിലൂടെ ഒരേസമയം പ്രവർത്തിക്കാൻ സാധിക്കും. അന്യ തൊഴിലാളികൾക്കു മാത്രമായി പ്രത്യേക ഹെൽപ്പ് ലൈൻ സംവിധാനവും ഇതിനൊപ്പം തയ്യാറാക്കിയിട്ടുണ്ട്. അതിനായി 9015978979 എന്ന നമ്പരിൽ ബന്ധപ്പെട്ട് ആവശ്യമുള്ള സേവനങ്ങൾക്കായുള്ള ഓപ്ഷനുകൾ തിരഞ്ഞെടുക്കാം. എല്ലാ ദിവസവും രാവിലെ ഏഴു മുതൽ വൈകിട്ട് ഏഴു വരെയാണു പ്രവർത്തനസമയം. ഹിന്ദി, ബംഗാളി, തമിഴ് ഭാഷകൾ തിരഞ്ഞെടുക്കുന്നതിനായി യഥാക്രമം 1, 2, 3 എന്ന് ഈ നമ്പറുകൾ അമർത്തുക. ഐ.വി.ആർ സംവിധാനത്തിലൂടെ ലഭിക്കുന്ന കോളുകൾ വിവിധ ഭാഷകൾ കൈകാര്യം ചെയ്യുന്ന 30 വോളന്റീയർമാർ സ്വീകരിക്കുകയും ജില്ലാ നേതൃത്വത്തിനു കൈമാറുകയും തുടർനടപടികൾ സ്വീകരിക്കുകയും ചെയ്യും. ഈ സംവിധാനത്തെപ്പറ്റിയുള്ള അറിയിപ്പ് പരമാവധി അതിഥി തൊഴിലാളികളിൽ എത്തിക്കാൻ എല്ലാവരും ശ്രമിക്കണമെന്ന് ജില്ലാ കളക്ടർ അഭ്യർത്ഥിച്ചു. ഇത് സംസ്ഥാനത്ത് ആദ്യമായി നടപ്പാക്കുന്നത് പത്തനംതിട്ട ജില്ലയിലാണ്.

വിളിക്കാം:

അന്യസംസ്ഥാന തൊഴിലാളികൾക്ക് ഫോൺ: 9015978979,

മറ്റുളളവർക്ക് ഫോൺ: 9205284484