തിരുവല്ല: കൊവിഡ് പ്രതിരോധത്തിന് തിരുവല്ല,മല്ലപ്പള്ളി താലൂക്ക് ആശുപത്രികളെ സജ്ജമാക്കുന്നതിന് മാത്യു ടി.തോമസ് എം.എൽ.എയുടെ ആസ്തി വികസന ഫണ്ടിൽ നിന്ന് 88 ലക്ഷം രൂപ അനുവദിച്ചു രണ്ട് താലൂക്ക് ആശുപത്രികളിലെയും തീവ്ര പരിചരണ വിഭാഗത്തിൽ ഉപയോഗിക്കാനുള്ള വെന്റിലേറ്ററുകൾ,ഓക്‌സിജൻ കോൺസൻട്രേറ്റർ,ആധുനിക കിടക്കകൾ,ഇ.സി.ജി മെഷിനുകൾ തുടങ്ങി ഉപകരണങ്ങൾ ബന്ധപ്പെട്ട സൂപ്രണ്ടുമാർ ആവശ്യപ്പെട്ടതു മുഴുവൻ അനുവദിക്കാനാണ് തീരുമാനം.കൊവിഡ് വ്യാപനം ഉണ്ടായ സമയംതന്നെ ആവശ്യമായ ഉപകരണങ്ങൾ വാങ്ങി സജ്ജമാക്കണമെന്ന് ആശുപത്രികളിൽ നേരിട്ട് സന്ദർശനം നടത്തി എം.എൽ.എ ആവശ്യപ്പെട്ടിരുന്നു.അതിനാവശ്യമായ മുഴുവൻ തുകയും ആസ്തി വികസന ഫണ്ടിൽ നിന്നും അനുവദിക്കാമെന്ന് അറിയിച്ചിരുന്നു. തിരുവല്ല താലൂക്ക് ആശുപത്രിക്ക് 68,02,509 രൂപയുടെയും മല്ലപ്പള്ളി താലൂക്ക് ആശുപത്രിക്ക് 20,83,558.90 രൂപയുടെയും ഉപകരണങ്ങളാണ് സൂപ്രണ്ടുമാർ ആവശ്യപ്പെട്ടത്. തുക അനുവദിച്ചു കൊണ്ടുള്ള കത്തുകൾ ജില്ലാ കളക്ടർ പി.ബി.നൂഹിന് എം.എൽ.എ കൈമാറി.