കൊല്ലം: സൗദിയിൽ ജോലി ചെയ്തുവന്ന മലയാളി നഴ്സ് രോഗബാധയെത്തുടർന്ന് മരിച്ചു. പുനലൂർ കരവാളൂർ ലിജി ഭവനിൽ ശീമോൻ അംബ്രോസിന്റെ മകൾ ലിജി സിബി(31)യാണ് സൗദി അറേബ്യയിലെ അബഹയിൽ വച്ച് മരിച്ചത്. സൗദിയിൽ ആരോഗ്യ മന്ത്രാലയത്തിലെ നേഴ്സ് ആയിരുന്നു. സൗദിയിൽ ഉദ്യോഗസ്ഥനായ ശാസ്താംകോട്ട ചക്കുവള്ളി സ്വദേശി സിബിയാണ് ഭർത്താവ്.. ഏകമകൾ മൂന്നു വയസ്സുള്ള ഇമാന ഇപ്പോൾ നാട്ടിലാണ്. പുനലൂർ വിളക്കു വെട്ടത്തു നിന്നും കരവാളൂരിൽ സ്ഥിരതാമസമാക്കിയതാണ് ഇവരുടെ കുടുംബം.( തേക്കുംകാട്ടിൽ പടിഞ്ഞാറ്റതിൽ).ശ്വാസകോശ സംബന്ധമായ രോഗത്തിന് ചികിത്സയിലായിരുന്നു ലിജി. രണ്ടു മാസം മുൻപു നാട്ടിലെത്തിയപ്പോഴും ചികിത്സയിലായിരുന്നു. അവധി കഴിഞ്ഞ് സൗദിയിലെത്തി ആശുപത്രിയിൽ ചികിത്സ തുടരുകയായിരുന്നു. ഇതിനിടയിൽ കൊവിഡ് രോഗികൾക്കായി ആശുപത്രി ക്രമീകരിക്കുന്നതിന്റെ ഭാഗമായി മറ്റു രോഗികളെ ഒഴിപ്പിച്ച കുട്ടത്തിൽ ലിജിയേയും ഡിസ്ചാർജ് ചെയ്തു. താമസ സ്ഥലത്തെത്തിയെങ്കിലും രോഗം മൂർച്ഛിച്ചതിനെ തുടർന്നായിരുന്നു മരണം.

മൃതദേഹം നാട്ടിലെത്തിക്കുവാൻ വിമാന സർവ്വീസുകൾ ഇല്ലാത്തത് പ്രതിസന്ധി സൃഷ്ടിച്ചിട്ടുണ്ട്. മാതാവ് ലിസി ശീമോൻ, സഹോദരി സിജി ലിജു.