കൊല്ലം: കോവിഡ് 19 ന്റെ പശ്ചാത്തലത്തിൽ തൊഴിൽ വകുപ്പിന്റെ ആഭിമുഖ്യത്തിൽ ജില്ലയിലെ അന്യ സംസ്ഥാന തൊഴിലാളികളുടെ വിവരശേഖരണം തുടങ്ങി. തൊഴിലാളികളുടെ സംസ്ഥാനം, മേൽവിലാസം, ആധാർ നമ്പർ, ബാങ്ക് വിവരങ്ങൾ, മൊബൈൽ നമ്പർ തുടങ്ങിയ വിവരങ്ങളാണ് ശേഖരിക്കുക. അസിസ്​റ്റന്റ് ലേബർ ഓഫീസർമാർ ജില്ലയിലെ വില്ലേജ് എക്സ്​റ്റൻഷൻ ഓഫീസർമാർ മുഖേനയാണ് വിവരശേഖരണം. ഇതിനോടകം 2,365 അന്യസംസ്ഥാന തൊഴിലാളികളുടെ വിവരങ്ങൾ ശേഖരിച്ചു. ഇന്ന് വൈകുന്നേരത്തോടെ വിവരശേഖരണം പൂർത്തിയാകുമെന്ന് ജില്ലാ ലേബർ ഓഫീസർ എ. ബിന്ദു അറിയിച്ചു.