സോഷ്യൽ മീഡിയകൾ കൊച്ചു കുട്ടികൾ മുതൽ പ്രായമായവർ വരെ ഉപയോഗിക്കുന്നുണ്ട്. ഫേസ്ബുക്ക്, ഇൻസ്റ്റഗ്രാം, ടിക്ക് ടോക്ക്, ട്വിറ്റർ തുടങ്ങിയ പ്ലാറ്റ്ഫോമുകളിൽ കുട്ടികൾ ഇപ്പോൾ വളരെ സജീവമാണ്. ഡാൻസും പാട്ടും അഭിനയവുമൊക്കെയായി ഒരു പാട് കുട്ടികളാണ് ടിക്ക്ടോക്ക് വിഡിയോകളിൽ നിറഞ്ഞു നിൽക്കുന്നത്. എന്നാൽ കുട്ടികളുടെ അമിത പ്രകടനം ദോഷം ചെയ്യും എന്നു വ്യക്തമായി തന്നെ പറയുകയാണ് ഗായിക ജ്യോത്സ്‌ന. പ്രായത്തിൽ കവിഞ്ഞ വികാരം കാണിക്കുന്ന നിരവധി കുട്ടികളുടെ വിഡിയോ താൻ കണ്ടിട്ടുണ്ടെന്നും എന്നാൽ അത് ക്യൂട്ടല്ല എന്നുമാണ് താരം പറയുന്നത്. ഇന്റർനെറ്റിൽ ലൈംഗിക ആസക്തിയുള്ളവരുണ്ടെന്നും കുട്ടികളെ കുട്ടികളായി തന്നെ കാണണമെന്നുമാണ് താരം ഫേസ്ബുക്കിൽ കുറിച്ചത്.
കുറിപ്പ് വായിക്കാം
ഞാൻ സാധാരണ അഭിപ്രായങ്ങളുമായി വരാറില്ല. പക്ഷേ ഒരമ്മയെന്ന നിലയിൽ ഇതെന്നെ വല്ലാതെ അലട്ടുന്നു. നമ്മൾ ഇതേക്കുറിച്ച്‌ ചിന്തിക്കേണ്ടതല്ലേ? എനിക്ക് അത്ഭുതം തോന്നുന്നു. കുട്ടികൾ കുട്ടികളായിരിക്കട്ടെ.
ചെറിയ കുട്ടികളുടെ ടിക് ടോക് വീഡിയോകൾ ധാരാളമായി കാണുന്നുണ്ട്. അതെ, ചിലത് വളരെ ക്യൂട്ട് ആണ്. ചിലതിൽ അവരുടെ പ്രായത്തെ തോൽപ്പിക്കുന്ന മുഖഭാവങ്ങളും വികാരങ്ങളുമെല്ലാം കാണുന്നു.. ഗൗരവത്തോടെ തന്നെ പറയട്ടെ. അത് ക്യൂട്ട് അല്ല. നല്ലതുമല്ല. ഇപ്പോൾ ഇന്റർനെറ്റിൽ നിറയെ കുട്ടികളോട് ലൈംഗികാസക്തിയുള്ളവരുമുണ്ട്. അതു നമ്മൾ മറക്കരുത്. കുട്ടികൾ കുട്ടികളായി തന്നെ ഇരിക്കട്ടെ.' ജ്യോത്സന കുറിച്ചു.