കൊവിഡ് 19നെ പ്രതിരോധിക്കാനുള്ള തീവ്രശ്രമത്തിലാണ് രാജ്യവും ലോകവും. കൊവിഡിനെതിരെയുള്ള പോരാട്ടത്തിൽ പൂർണ്ണ പിന്തുണയുമായി സിനിമാ താരങ്ങളും കൂടെയുണ്ട്. സാമ്പത്തിക സഹായം മാത്രമല്ല ബോധവത്കരണകാര്യത്തിലും മുന്നിൽതന്നെയാണ്. ഇപ്പോൾ മാസ്ക് അണിയുന്നതിന്റെ പ്രാധാന്യം ഒരു കാമ്പയിൻ പോലെ അവതരിപ്പിക്കുകയാണ് താരങ്ങൾ.

കൊവിഡ് രോഗം വ്യാപിക്കാതിരിക്കാൻ ആളുകൾ വീട്ടിനുള്ളിൽ കഴിയുകയാണ്. ആരെങ്കിലും പുറത്തിറങ്ങുകയാണെങ്കിൽ മാസ്ക് ധരിക്കാൻ മറക്കേണ്ട എന്നാണ് സർക്കാരും ആരോഗ്യപ്രവർത്തകരും പറയുന്നത്. മുഖമേതായാലും മാസ്ക് മുഖ്യം എന്ന വാചകത്തോടെയുള്ള ഈ പ്രചാരണത്തിന് മഞ്ജു വാര്യർ, കുഞ്ചാക്കോ ബോബൻ,നിവിൻ പോളി, ജയസൂര്യ, ടൊവിനോ തോമസ്, ആസിഫ് അലി,​ പ്രയാഗ മാർട്ടിൻ തുടങ്ങിയവർ മാസ്‌ക് ധരിച്ച്‌ നിൽക്കുന്ന ചിത്രങ്ങൾ സോഷ്യൽ മീഡിയയിൽ പോസ്റ്റ് ചെയ്തിട്ടുണ്ട് .