കൊവിഡിനെതിരായ പോരാട്ടത്തിന് ദുരിതാശ്വാസ പ്രവർത്തനങ്ങൾക്കായി ഒരു കോടി 30 ലക്ഷം രൂപ സംഭാവന നല്‍കി നടന്‍ വിജയ്. കേരളത്തിന് പത്ത് ലക്ഷം രൂപയും നല്‍കി. പ്രധാനമന്ത്രിയുടെ ദുരിതാശ്വാസ നിധിയിലേക്ക് 25 ലക്ഷം, തമിഴ്നാട് മുഖ്യമന്ത്രിയുടെ ദുരിതാശ്വാസ നിധിയിലേക്ക് 50 ലക്ഷം, കേരള മുഖ്യമന്ത്രിയുടെ ദുരിതാശ്വാസ നിധിയിലേക്ക് 10 ലക്ഷം, തമിഴ് സിനിമാ സംഘടനയായ ഫെഫ്സിയിലേക്ക് 25 ലക്ഷം, കർണാടക മുഖ്യമന്ത്രിയുടെ ദുരിതാശ്വാസ നിധിയിലേക്ക് അഞ്ച് ലക്ഷം, ആന്ധ്രാ, തെലങ്കാന, പോണ്ടിച്ചേരി എന്നിവിടങ്ങളിലെ മുഖ്യമന്ത്രിമാരുടെ ദുരിതാശ്വാസ നിധികളിലേക്ക് അഞ്ച് ലക്ഷം വീതം എന്നിങ്ങനെയാണ് വിജയ് നല്‍കിയിരിക്കുന്നത്.

ഇതിന് പുറമെ ഫാൻസ് ക്ലബ്ബുകൾ വഴി സഹായം ആവശ്യമുള്ളവർക്ക് നേരിട്ടെത്തിക്കാനുള്ള പണവും വിജയ് നല്‍കിയിട്ടുണ്ട്.

ലോകേഷ് കനഗരാജ് സംവിധാനം ചെയ്യുന്ന വിജയ്‌യുടെ ഏറ്റവും പുതിയ ചിത്രം 'മാസ്റ്റർ', ലോക്ക്ഡൗൺ തീരുന്നതിന് പിന്നാലെ റിലീസ് ചെയ്യുമെന്നാണ് പ്രതീക്ഷിക്കുന്നത്. കൊവിഡ് പ്രതിസന്ധിയിൽ കേരളത്തിന് കൈത്താങ്ങായി ദക്ഷിണേന്ത്യയിലെ വിവിധ ഭാഷകളിലുള്ള സിനിമാ താരങ്ങൾ രംഗത്തെത്തിയിരുന്നു. കോവിഡ് പ്രതിരോധത്തിനായി മുഖ്യമന്ത്രിയുടെ ദുരിതാശ്വാസ നിധിയിലേക്ക് അല്ലു അർജുൻ 25 ലക്ഷം രൂപയാണ് നല്‍കിയത്. തെലങ്കാന, ആന്ധ്രാപ്രദേശ് എന്നീ സംസ്ഥാനങ്ങൾക്ക് നല്‍കിയ ദുരിതാശ്വാസ തുകയ്‌ക്കു പുറമേയാണ് അല്ലു അർജുൻ കേരളത്തിനും സംഭാവന നല്‍കിയത്.