നടൻ രവി വള്ളത്തോളിന്റെ വേർപാടിൽ ആദരാജ്ഞലികൾ അർപ്പിച്ച് സംവിധായകൻ രഞ്ജിത് ശങ്കർ. രവി വള്ളത്തോളുമായുള്ള നീണ്ടനാളത്തെ ബന്ധത്തെക്കുറിച്ച് ഫേസ്ബുക്ക് കുറിപ്പിൽ രഞ്ജിത് ശങ്കർ അനുസ്മരിച്ചു. താന്‍ ആദ്യമായി പരിചയപ്പെടുന്ന സിനിമ നടൻ രവി വള്ളത്തോള്‍ ആണെന്ന് രഞ്ജിത് പറയുന്നു.
രഞ്ജിത് ശങ്കറിന്റെ ഫേസ്ബുക്ക് കുറിപ്പ് :
ഞാന്‍ ആദ്യമായി പരിചയപ്പെടുന്ന സിനിമാ നടന്‍ രവിയേട്ടനാണ്. ആദ്യമായി തിരക്കഥയെഴുതിയ നിഴലുകള്‍, പിന്നീടെഴുതിയ അമേരിക്കൻ ഡ്രീംസ് എന്നീ സീരിയലുകളിലെ നായകന്‍. അതിലുമുപരി വളരെ അടുത്ത വ്യക്തി ബന്ധം.
അമേരിക്കൻ ഡ്രീംസിനു മികച്ച നടനുള്ള സംസ്ഥാന അവാർഡ് കിട്ടി കഴിഞ്ഞ് രവിയേട്ടൻ എന്നെ വിളിച്ചു ചോദിച്ചു “ഇനി ഒരു സിനിമയൊക്കെ ചെയ്യാറായില്ലേ?” ഞാൻ പറഞ്ഞു എനിക്കാരെയും സിനിമയിൽ പരിചയമില്ല. മമ്മൂട്ടിയോട് ഒരു കഥ പറയാമോ എന്ന് രവിയേട്ടൻ ചോദിച്ചു. അദ്ദേഹം എനിക്കു വേണ്ടി മമ്മുക്കയോട് തുടർച്ചയായി സംസാരിച്ചു. അങ്ങിനെ ആദ്യമായി ഞാൻ മമ്മൂക്കയോട് പാസഞ്ചറിന്റെ കഥ പറയുന്നു.
സിനിമയില്‍ സജീവമായതിനു ശേഷവും രവിയേട്ടനുമായി ഇടയ്ക്കു സംസാരിക്കും. ഓർമിക്കപ്പെടുന്ന ഒരു വേഷം എന്റെ ഒരു സിനിമയിൽ അദ്ദേഹം ചെയ്യണമെന്ന എന്റെ ആഗ്രഹം പല കാരണങ്ങളാല്‍ നടന്നില്ല.
ഓര്‍മകള്‍ മാത്രം ബാക്കിയാവുന്നു.