പത്തനാപുരം: വനംവകുപ്പിന്റെ അധീനതയിലുള്ള സ്ഥലത്തു നിന്ന് തേക്കിൻതടി മുറിച്ചുകടത്തിയ രണ്ടുപേർ അറസ്റ്റിൽ. പത്തനാപുരം ഫോറസ്റ്റ് റേഞ്ചിൽ കടയ്ക്കാമൺ ശിവൻപാറ ഭാഗത്തു നിന്നാണ് തേക്കിൻ തടി മോഷണം പോയത്.കരിമ്പാലൂർ തെങ്ങുംതറപുരയിടത്തിൽ ഹനീഫ(58), മകൻ അംജദ്ഖാൻ(21) എന്നിവരാണ് വനംവകുപ്പിന്റെ പിടിയിലായത്.

വനഭൂമിയിൽ ഉണങ്ങി നിന്നിരുന്നതും നിലത്തുവീണതുമായ തടികളാണ് ഇവർ മുറിച്ചുകടത്തിയത്. വനംവകുപ്പിലെ ഫീൽഡ് സ്റ്റാഫിന്റെ പരിശോധനയിലാണ് തടികൾ കടത്തിയതായി കണ്ടെത്തിയത്. തുടർന്നു നടത്തിയ അന്വേഷണത്തിലാണ് പ്രതികൾ പിടിയിലായത്. തടികൾ പ്രതികളുടെ വീട്ടിൽ നിന്നും വനഭൂമിയിൽ ഒളിപ്പിച്ച നിലയിലും കണ്ടെത്തി. അന്വേഷണത്തിന് പത്തനാപുരം റേഞ്ച് ഫോറസ്റ്റ് ഓഫീസർ എസ്. അനീഷ്, ഡെപ്യൂട്ടി റേഞ്ച് ഫോറസ്റ്റ് ഓഫീസർ എ. നിസാം, ഫ്ലൈയിംഗ് സ്‌ക്വാഡ് ആർ.എഫ്.ഒ അജികുമാർ, ബി. സുന്ദരൻ, എൻ. കനകരാജ്, ശരണ്യകൃഷ്ണൻ, സന്ധ്യ, മഹേഷ്, പ്രസന്നൻ, രാജേന്ദ്രബാബു, ജയൻ, ശ്രീകുമാർ എന്നിവർ നേതൃത്വം നൽകി.