കൊവിഡ് പ്രതിരോധ പ്രവർത്തനങ്ങൾക്കായി ഇന്ത്യയിലെ വാഹന നിർമാതാക്കളുടെ ശക്തമായ പിന്തുണയാണ് ലഭിക്കുന്നത്. ഇപ്പോഴിതാ കൊറോണ വൈറസ് പ്രതിരോധത്തിന്റെ ഭാഗമായി വാഹനനിർമാതാക്കളായ മാരുതി സുസുക്കി 20 ദിവസത്തിനുള്ളിൽ 1500 വെന്റിലേറ്ററുകളുടെ നിർമാണം പൂർത്തിയാക്കിയതായി റിപ്പോർട്ട്.

വൈറസ് ബാധിതരുടെ എണ്ണം ഉയർന്നതോടെ കേന്ദ്ര സർക്കാർ ഇന്ത്യയിലെ വാഹനനിർമാതാക്കളോട് വെന്റിലേറ്റർ നിർമിക്കാൻ ആവശ്യപ്പെട്ടിരുന്നു. ഇതേതുടർന്നാണ് മാരുതി നിർമാണം ആരംഭിച്ചത്.

1500 വെന്റിലേറ്ററുകളുടെ നിർമാണം പൂർത്തിയായിട്ടുണ്ടെങ്കിലും ഇത് ആശുപത്രികൾക്കോ മറ്റ് ആരോഗ്യ സ്ഥാപനങ്ങൾക്കോ കൈമാറാൻ സർക്കാർ ഉത്തരവായിട്ടില്ലെന്ന് മാരുതി ചെയർമാൻ ആർ.സി ഭാർഗവ പറഞ്ഞു.രാജ്യം കടുത്ത പ്രതിസന്ധിയിലൂടെ കടന്നുപോകുമ്പോൾ സഹായിക്കുകയെന്നത് ഉത്തരവാദിത്വമായാണ് കമ്പനി കാണുന്നതെന്നും അദ്ദേഹം പറഞ്ഞു.