പാവറട്ടി : സൈക്കിൾ സ്വന്തമാക്കുകയെന്ന തന്റെ ആഗ്രഹം നിറവേറ്റാനാണ് കാശ് കുടുക്കയിൽ പൈസ സ്വരുക്കൂട്ടിവയ്ക്കാൻ പാവറട്ടി സെന്റ് ജോസഫ് സി.എം.ഐ സ്‌കൂളിലെ യു.കെ.ജി വിദ്യാർത്ഥിയായ കാക്കശ്ശേരി ചിറയത്ത് ജിയോയുടെയും അദ്ധ്യാപികയായ സിനിയുടെയും മകനായ ഏദൻ ആദം ജിയോ എന്ന കൊച്ചു മിടുക്കൻ തീരുമാനിച്ചത്. പക്ഷേ മുഖ്യമന്ത്രിയുടെ പത്ര സമ്മേളനത്തിൽ കുട്ടികൾ ദുരിതാശ്വാസ നിധിയിലേക്ക് പണം നൽകുന്ന വാർത്ത ഏദന്റെ ശ്രദ്ധയിൽപ്പെട്ടപ്പോഴാണ് ആ കുഞ്ഞു മനസ്സിലും തനിക്കും സഹായം നൽകണമെന്ന ആഗ്രഹം ഉണ്ടായത്. തുടർന്ന് കാശ് കുടുക്ക മുഖ്യമന്ത്രിക്ക് നൽകണമെന്ന് രക്ഷിതാക്കളോട് ഏദൻ പറഞ്ഞു. ഇതുപ്രകാരം മുരളി പെരുനെല്ലി എം.എൽ.എ. ഏദനിൽ നിന്നും കുടുക്കയിലെ 2610 രൂപ ഏറ്റുവാങ്ങി. സി.പി.എം ചിറ്റാട്ടുകര ലോക്കൽ സെക്രട്ടറി പി.ജി. സുബിദാസ്, മുല്ലശ്ശേരി ബ്ലോക്ക് പഞ്ചായത്ത് പ്രസിഡന്റ് ലതി വേണുഗോപാൽ, സി.എഫ്. രാജൻ, തുളസി രാമചന്ദ്രൻ, പി.എ. സുനിൽ എന്നിവർ പങ്കെടുത്തു.

പടം. യു.കെ.ജി.വിദ്യാർത്ഥി ഏദൻ ആദം ജിയോയിൽ നിന്നും ദുരിതാശ്വാസ നിധിയിലേക്കുള്ള സംഭാവന മുരളി പെരുനെല്ലി എം.എൽ.എ. സ്വീകരിക്കുന്നു.