തൃശൂർ: സാമൂഹിക സുരക്ഷാ പെൻഷൻ രണ്ടാം ഘട്ടം 142.78 കോടി വിതരണം ചെയ്തു. ഇതോടെ സാമൂഹിക പെൻഷന്റെ രണ്ടാം ഘട്ട വിതരണം 98.07% പൂർത്തിയായി. 2,28,423 ഗുണഭോക്താക്കൾക്കാണ് ഇതുവരെ രണ്ടാം ഘട്ട പെൻഷൻ ലഭിച്ചത്. തൃശൂർ താലൂക്കിൽ 43,799 പേർക്കും, ചാവക്കാട് 31,389 മുകുന്ദപുരം 32,235, ചാലക്കുടി 31,940, തലപ്പിള്ളി 38,226, കൊടുങ്ങല്ലൂർ 28,904, കുന്നംകുളം 21,930 എന്നിങ്ങനെയാണ് പെൻഷൻ ലഭിച്ചവർ. 158 സഹകരണ സംഘം വഴിയാണ് പെൻഷൻ വിതരണം. ആദ്യ ഘട്ടത്തിൽ 2019 ഒക്ടോബർ, നവംബർ മാസങ്ങളിലെ പെൻഷനാണ് വിതരണം ചെയ്തത്. രണ്ടാം ഘട്ടത്തിൽ 2019 ഡിസംബർ, 2020 ജനുവരി, ഫെബ്രുവരി, മാർച്ച്, മാസങ്ങളിലെ പെൻഷനും ഏപ്രിൽ മാസത്തിലെ പെൻഷൻ അഡ്വാൻസുമാണ് നൽകുന്നത്. കൊവിഡ് 19 പശ്ചാത്തലത്തിൽ എല്ലാവിധ മുൻകരുതലുകളുമെടുത്താണ് പെൻഷൻ വിതരണം നടത്തുന്നതെന്ന് ജോയിന്റ് രജിസ്ട്രാർ അറിയിച്ചു.

വിതരണം ചെയ്തത് ഇങ്ങനെ

കർഷക തൊഴിലാളി പെൻഷൻ 16.6 കോടി

വാർദ്ധക്യകാല പെൻഷൻ 70.63 കോടി

വികലാംഗ പെൻഷൻ 11.51 കോടി

അവിവാഹിതരായ സ്ത്രീകൾക്കുള്ള പെൻഷൻ 4.92 കോടി

വിധവാ പെൻഷൻ 41. 86 കോടി

ആകെ 145.58 കോടി