തിരുവനന്തപുരം: വ്യാജചാരായവും കോടയുമായി ഒരാളെ പൂന്തുറ പൊലീസ് പിടികൂടി. മുട്ടത്തറ പുത്തൻപള്ളി വാർഡിൽ ബദരിയനഗർ പള്ളിക്ക് സമീപം അബ്ദുൾ സലാമാണ് (47) പിടിയിലായത്. ലോക്ക് ഡൗണുമായി ബന്ധപ്പെട്ട് ബിവറേജ് ഷോപ്പുകൾ അടച്ചതിനാൽ രഹസ്യ വില്പന നടത്തുന്നതിനായി ചാരായം വാറ്റുന്നതിനിടെയാണ് ഇയാളെ പൊലീസ് പിടികൂടിയത്. ടെറസിൽ അതീവ രഹസ്യമായി ഗ്യാസ് സിലിണ്ടർ, പ്രഷർകുക്കർ, വാറ്റാനുപയോഗിക്കുന്ന മറ്റു വസ്തുക്കൾ എന്നിവ ഉപയോഗിച്ചാണ് ചാരായവാറ്റ് നടത്തിയിരുന്നത്. പ്ലാസ്റ്റിക് കുപ്പികളിൽ നിറച്ച വാറ്റ് ചാരായവും, 20 ലിറ്റർ കോടയും ഇയാളിൽ നിന്ന് പിടികൂടി. പൂന്തുറ എസ്.എച്ച്.ഒ സജികുമാറിന് ലഭിച്ച രഹസ്യവിവരത്തെ തുടർന്ന് ഇയാളുടെ വീട്ടിൽ പരിശോധനക്കെത്തുമ്പോൾ ഇയാൾ ചാരായ വാറ്റിൽ ഏർപ്പെട്ടിരിക്കുകയായിരുന്നു. പൂന്തുറ എസ്.എച്ച്.ഒ സജികുമാർ ബി.എസ്, എസ്.ഐ ബിനു.ആർ, ക്രൈം എസ്.ഐ അശോകൻ, അഡിഷണൽ എസ്.ഐ സുരേഷ് കുമാർ,എ.എസ്.ഐ സുധീർ,സിവിൽ പൊലീസ് ഓഫീസർമാരായ മനു, വിമൽ പ്രഭാകർ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.