കോവളം: ലോക്ക് ഡൗണിനെ തുടർന്ന് ഭക്ഷണമില്ലാതെ വലഞ്ഞ അന്യസംസ്ഥാന തൊഴിലാളികൾക്ക് കേരളകൗമുദി വാർത്ത തുണയായി. നഗരസഭയുടെ മുല്ലൂർ വാർഡിലെ 350ഓളം തൊഴിലാളികൾ കഴിഞ്ഞ ദിവസങ്ങളിൽ ഭക്ഷണമില്ലാതെ വലഞ്ഞ വാർത്ത കേരളകൗമുദി പ്രസിദ്ധീകരിച്ചിരുന്നു. തുടർന്ന് നഗരസഭയും വിഴിഞ്ഞം ജനമൈത്രി പൊലീസുമാണ് തൊഴിലാളികൾക്ക് സഹായവുമായി രംഗത്തെത്തിയത്. നെല്ലിക്കുന്ന്, മുക്കോല, പുളിങ്കുടി, മുല്ലൂർ, വട്ടവിള, പയറുമൂട്, ശാന്തിപുരം, ഉച്ചക്കട, കിടാരക്കുഴി, തലയ്ക്കോട് എന്നിവടങ്ങളിലെ തൊഴിലാളികൾക്ക് ആവശ്യമായ പച്ചക്കറികളും ധാന്യങ്ങളുമാണ് വാർഡ് കൗൺസിലർ സി. ഓമനയുടെയുടെയും വിഴിഞ്ഞം പൊലീസിന്റെയും നേതൃത്വത്തിൽ ക്യാമ്പുകളിൽ വിതരണം ചെയ്‌തത്.