എറണാകുളം: കർണാടകം അതിർത്തി കയ്യേറിയാണ് റോഡുകൾ അടച്ചതെന്ന സത്യവാങ്മൂലവുമായി കേരളം ഹൈക്കോടതിയിൽ. കാസർകോട് - മംഗലാപുരം അതിർത്തിയിലെ പത്തോർ റോഡാണ് അതിക്രമിച്ച് കയ്യേറി കർണാടക അടച്ചതെന്ന് കേരളം ഹൈക്കോടതിയെ അറിയിച്ചു. 200 മീറ്റ‍ർ കേരള അതിർത്തിയിലേക്ക് കർണാടക അതിക്രമിച്ച് കയറിയിട്ടുണ്ട്. കർണാടക അതിർത്തി അടച്ചത് കാരണം ചികിത്സ കിട്ടാതെ മരിച്ചത് ആറ് പേരാണെന്നും കോടതിയെ കേരളം അറിയിച്ചു.
കേരള, കർണാടക അതിർത്തിയിലുള്ള 17 റോഡുകളിൽ 12 എണ്ണം അടയ്ക്കാൻ തീരുമാനിച്ചത് ഇരുസംസ്ഥാനങ്ങളും സംയുക്തമായാണെന്ന് കേരളം വ്യക്തമാക്കുന്നു. എന്നാൽ അഞ്ച് റോഡുകൾ കൂടി കർണാടകം നിർബന്ധപൂ‍ർവം അടയ്ക്കുകയായിരുന്നു. ഇത് കേന്ദ്രനിർദേശത്തിന്‍റെ ലംഘനമാണ്. തലപ്പാടി ദേശീയ ഹൈവേ അടക്കം അഞ്ച് റോഡുകളാണ് കർണാടക മണ്ണ് ഉയർത്തി അടച്ചത്. ഇതുവഴി അടിയന്തര ആവശ്യത്തിന് വരുന്ന ആംബുലൻസുകളെപ്പോലും കയറ്റി വിടുന്നില്ല. കർണാടകയിൽ ചികിത്സ നടത്തുന്ന ആറ് പേരാണ് മരിച്ചത്. ഇത് വഴി കയറ്റി വിട്ടിരുന്നെങ്കിൽ ഇവരുടെ ജീവൻ രക്ഷിക്കാമായിരുന്നു. എല്ലാവരും അടിയന്തര ചികിത്സ ആവശ്യമുള്ളവരായിരുന്നു. അതിർത്തി അടച്ചതിലൂടെ കർണാടക സ്വീകരിക്കുന്നത് മനുഷ്യത്വ രഹിതമായ നിലപാടാണെന്നും കേരളം ഹൈക്കോടതിയെ ബോദ്ധ്യപ്പെടുത്തി.
കാസർകോട് സ്വദേശികൾക്ക് ചികിത്സ നൽകാൻ ഒരുക്കമാണെന്ന് മംഗലാപുരത്തെ ആശുപത്രികൾ നേരത്തേ തന്നെ ദക്ഷിണ കന്നഡ ഡെപ്യൂട്ടി കമ്മീഷണറെ അറിയച്ചതാണ്. ഈ വിഷയം കേരളം ഔദ്യോഗികമായി ഉന്നയിച്ച എല്ലാ ഇടത്തും, കർണാടക മറച്ചുവച്ചു. ആശുപത്രി ഉടമകൾ ഒരുമിച്ച് നൽകിയ കത്ത് കേരളം സത്യവാങ്മൂലത്തിനൊപ്പം ഹൈക്കോടതിയ്ക്ക് കൈമാറി. ആശുപത്രികൾ നിറഞ്ഞു കവിഞ്ഞതിനാൽ രോഗികളെ ഇനി അങ്ങോട്ട് പ്രവേശിപ്പിക്കാനാകില്ലെന്നും ചികിത്സ നൽകാനാകില്ലെന്നുമുള്ള വാദം തെറ്റെന്നും സർക്കാർ ഹൈക്കോടതിയെ അറിയിച്ചു.
കണ്ണൂർ എസ്‌.പി അടക്കം സ്ഥലത്ത് വന്ന് ചർച്ച നടത്തുന്നതിനിടെയാണ് ഏകപക്ഷീയമായി കർണാടക മണ്ണിട്ട് അതിർത്തി അടയ്ക്കുന്നത്. പിന്നീട് മുഖ്യമന്ത്രി അടക്കം കർണാടക സർക്കാരിനോട് വിളിച്ച് സംസാരിച്ചിട്ടും അവർ അയയാൻ തയ്യാറായില്ല. തുടർന്ന് കേന്ദ്രസർക്കാരിനെയും കേരളം സമീപിച്ചിരുന്നെങ്കിലും അനുകൂല നടപടിയുണ്ടായില്ല.
ഒരാൾപ്പൊക്കത്തിൽ മണ്ണിട്ട് ഉയർത്തിയ കർണാടകം ഇതുവഴി വരുന്ന ഒരു വാഹനത്തെയും കടത്തി വിടുന്നില്ല. കുടക് - കേരള അതിർത്തി തുറക്കില്ലെന്ന് ഉറച്ച നിലപാടാണ് ദക്ഷിണ കന്നഡയിലെ എം.പിമാരും മറ്റ് ജനപ്രതിനിധികളും സ്വീകരിച്ചത്. കേരളത്തിന്‍റെ സമ്മർദ്ദത്തിന് വഴങ്ങി അതിർത്തി തുറന്നാൽ സമരത്തിലേക്ക് നീങ്ങുമെന്നാണ് കർണാടകത്തിലെ ജനപ്രതിനിധികൾ മുഖ്യമന്ത്രി യെദിയൂരപ്പയ്ക്ക് മുന്നറിയിപ്പ് നൽകിയത്. തത്ക്കാലം കേരളത്തിലേക്കുള്ള ചരക്ക് നീക്കം ബാവലി - മുത്തങ്ങ ചെക്ക് പോസ്റ്റുകൾ വഴി മാത്രം മതിയെന്ന് കർണാടക സർക്കാർ തീരുമാനിച്ചിരുന്നു. കേരളത്തിൽ കൊറോണ രോഗബാധിതർ കൂടുന്നത് കൊണ്ട് വഴി അടച്ചില്ലെകിൽ കുടകിൽ രോഗം പകരുമെന്ന വാദമാണ് കർണാടകം ഉന്നയിച്ചത്.