എടത്വാ : കുളിക്കാനിറങ്ങിയ ബി.കോം വിദ്യാർത്ഥി മണിമല ആറ്റിൽ മുങ്ങി മരിച്ചു. തലവടി പഞ്ചായത്ത് രണ്ടാം വാർഡിൽ നാരകത്തറമുട്ട് തടത്തിൽ സജിയുടെ മകൻ ജെയ്സൺ (21) ആണ് മരിച്ചത്. ഇന്നലെ വൈകിട്ട് 3.30ന് തലവടി പുരയ്ക്കൽ കടവിന് സമീപമായിരുന്നു അപകടം. ജെയ്സണും സുഹൃത്ത് രോഹിത്തും ആറിന് കുറുകെ നീന്തുന്നതിനിടെ ജെയ്സണിന്റെ കാൽ കുഴഞ്ഞതിനെത്തുടർന്ന് ആഴത്തിലേക്ക് മുങ്ങിപ്പോകുകയായിരുന്നു. രോഹിത്തിന്റെ അലർച്ചകേട്ട് സമീപവാസികൾ തെരച്ചിൽ നടത്തിയെങ്കിലും ജെയ്സണെ കണ്ടെത്താനായില്ല. തിരുവല്ലയിൽ നിന്നെത്തിയ ഫയർഫോഴ്സാണ് മൃതദേഹം കരയ്ക്കെത്തിച്ചത്.മൃതദേഹം തിരുവല്ലയിലെ സ്വകാര്യ ആശുപത്രി മോർച്ചറിയിലേക്ക് മാറ്റി. മല്ലപ്പള്ളി മാർ ഇവാനിയേഴ്സ് കോളേജിലെ മൂന്നാം വർഷ ബികോം വിദ്യാർത്ഥിയായിരുന്നു. മാതാവ്: ജിഷ. ഏക സഹോദരൻ ജെസ്‌വിൻ.