ഉത്തരാഖണ്ഡ്: ത്തരാഖണ്ഡിൽ നാലുപേർക്ക് കൂടി കൊവിഡ് 19 സ്ഥിരീകരിച്ചു. എല്ലാവരും നിസാമുദ്ദീനിലെ തബ്‍ലീ​ഗ് സമ്മേളനത്തിൽ പങ്കെടുത്ത് തിരിച്ചെത്തിയവരാണ്. ഇതോടെ സംസ്ഥാനത്തെ കൊവിഡ് 19 രോ​ഗബാധിതരുടെ എണ്ണം 26 ആയി. ആകെയുള്ള ഈ കണക്കിൽ 18 പേരും നിസാമുദ്ദീനിലെ സമ്മേളനത്തിൽ പങ്കെടുത്തവരാണ്.

സംസ്ഥാനത്ത് കലാധുങ്കി പ്രദേശത്തു നിന്നും സമ്മേളനത്തിൽ പങ്കെടുത്ത ഒരാൾക്ക് വൈറസ് ബാധിച്ചതായി നൈനിറ്റാളിലെ അഡീഷണൽ ചീഫ് മെഡിക്കൽ ഓഫീസർ ഡോ.രശ്മി പന്ത് സ്ഥിരീകരിച്ചു. നൈനിറ്റാളിൽ നിന്നുള്ള മറ്റൊരു ​രോ​ഗി മൊറാദാബാദിൽ വച്ചു നടന്ന മതസഭയിൽ പങ്കെടുത്തിരുന്നുവെന്നും നിസാമുദ്ദീനിൽ പോയിട്ടില്ലെന്നും ആരോ​ഗ്യ ഉദ്യോ​ഗസ്ഥർ പറയുന്നു.

ഇയാളുടെ വീട്ടിലെ അഞ്ച് അം​ഗങ്ങളെയും കൊവിഡ് 19 പരിശോധനയ്ക്ക് വിധേയരാക്കി. നിസാമുദ്ദീനിൽ നിന്ന് തിരികെ എത്തിയവരേയും അവരുമായി അടുത്തിടപഴകിയവരെും നിരീക്ഷിച്ചു കൊണ്ടിരിക്കുകയാണ്. അവരുടെ ആരോ​ഗ്യ സ്ഥിതിയും നിരീക്ഷണത്തിലാണ്.