കൊവിഡിനെ തുടർന്ന് പ്രഭാസ് നായകനാകുന്ന പുതിയ ചിത്രത്തിന്റെ ഷൂട്ടിംഗ് താത്കാലികമായി നിറുത്തി. നിർമ്മാതാക്കളായ യുവി ക്രിയേഷൻ ട്വിറ്റർ മുഖേനയാണ് ഇക്കാര്യം ഔദ്യോഗികമായി പുറത്തുവിട്ടത്. ജോർജ്ജിയ ഉൾപ്പെടെ വിവിധയിടങ്ങളിലായിരുന്നു ചിത്രത്തിന്റെ ലൊക്കേഷൻ.

വിദേശത്തെ ഷൂട്ടിംഗ് പൂർത്തിയാക്കി കഴിഞ്ഞ മാസം പ്രഭാസും സംഘവും ഹൈദരാബാദിൽ എത്തിയിരുന്നു. ഷൂട്ടിംഗ് കൊവിഡ് മൂലം നിറുത്തിവച്ചതോടെ പ്രഭാസ് ചിത്രം തിയേറ്ററിലെത്താൻ വൈകും. പൂജ ഹെഡ്‌ഗെ നായികയാവുന്ന ചിത്രം ആക്ഷൻ ത്രില്ലർ ജില്ലിന്റെ സംവിധായകൻ രാധാകൃഷ്ണകുമാറാണ് ഒരുക്കുന്നത്. തെലുങ്ക് സിനിമാ രംഗത്തെ പ്രമുഖ നിർമ്മാണ കമ്പനിയായ ഗോപി കൃഷ്ണ മൂവീസും യുവി ക്രിയേഷനും ചേർന്നാണ് ചിത്രം നിർമ്മിക്കുന്നത്. ശ്രീകാന്ത് പ്രസാദാണ് ചിത്രത്തിന്റെ എഡിറ്റിംഗ് നിർവഹിക്കുന്നത്.