തിരുവനന്തപുരം: നിത്യോപയോഗ സാധനങ്ങളുടെ വില വർദ്ധിപ്പിച്ച് കൊവിഡ് പ്രതിസന്ധിക്കാലത്ത് സർക്കാർ ജനങ്ങളെ കൊള്ളയടിക്കുകയാണെന്ന് ബി.ജെ.പി സംസ്ഥാന അദ്ധ്യക്ഷൻ കെ.സുരേന്ദ്രൻ ആരോപിച്ചു. പൊതുവിപണിയിൽ നിത്യോപയോഗ സാധന വില തോന്നുംപോലെയാണ്. ഇപ്പോൾ സപ്ലൈകോ വഴി നൽകുന്ന സാധനങ്ങളുടെയും വില വർദ്ധിപ്പിച്ച് സർക്കാരും ജനങ്ങളെ കൊള്ളയടിക്കുകയാണ്. ധൂർത്തു നടത്തി സാമ്പത്തിക പ്രതിസന്ധിയിലായ സർക്കാരിന് വരുമാനമുണ്ടാക്കാൻ ജനങ്ങളുടെ മടിക്കുത്തിനു പിടിക്കുകയല്ല വേണ്ടതെന്ന് പറഞ്ഞ സുരേന്ദ്രൻ സപ്ലൈകോയിലെ വില വർദ്ധനവ് സർക്കാർ അടിയന്തരമായി പിൻവലിക്കണമെന്നും പൊതുവിപണിയിലെ വില വർദ്ധന നിയന്ത്രിക്കാനുള്ള നടപടികളുണ്ടാകണമെന്നും ആവശ്യപ്പെട്ടു.