ഉള്ളൂർ: മെഡിക്കൽ കോളേജ് ആശുപത്രിയിൽ സജ്ജീകരിച്ച ടെലി കൺസൾട്ടേഷൻ സംവിധാനം കാമ്പസിലെ മറ്റു സ്ഥാപനങ്ങളെക്കൂടി ഉൾപ്പെടുത്തി വിപുലീകരിച്ചു. കൊവിഡ് 19 നിയന്ത്രണത്തിന്റെ ഭാഗമായി ലോക്ക് ഡൗൺ ഏർപ്പെടുത്തിയതിനാൽ മെഡിക്കൽ കോളേജിലെ ഒ.പിയിലെ ചികിത്സാ സംവിധാനത്തിൽ മാറ്റം വരുത്തിയിരുന്നു. ആശുപത്രിയിലെ എല്ലാ ചികിത്സാ വിഭാഗങ്ങളിലും രോഗികൾക്ക് ചികിത്സയുമായി ബന്ധപ്പെട്ട സംശയങ്ങളിൽ ഡോക്ടർമാരുടെ ഉപദേശം തേടാനാകുംവിധമാണ് ടെലി കൺസൾട്ടേഷൻ സംവിധാനം പ്രവർത്തിക്കുന്നത്. തിങ്കൾ മുതൽ ശനി രാവിലെ 9 മുതൽ 12 വരെ രോഗികൾക്ക് 0471 2528080 എന്ന ഫോൺ നമ്പരിൽ വിളിച്ച് അതത് ഡോക്ടർമാരുമായി സംസാരിക്കാം. പദ്ധതി നിരവധി രോഗികൾക്ക് പ്രയോജനകരമായി മാറിയതോടെയാണ് കാമ്പസിലെ മറ്റു സ്ഥാപനങ്ങളും ടെലി കൺസൾട്ടേഷന്റെ ഭാഗമായത്. എസ്.എ.ടി, ഗവ. ഡെന്റൽ കോളേജ് എന്നിവയ്ക്കൊപ്പം ഗവ. കണ്ണാശുപത്രിയും ഇതിൽ ഉൾപ്പെട്ടിട്ടുണ്ട്. രോഗികളുടെ ചികിത്സ സംബന്ധിച്ച സംശയനിവാരണമാണ് ഇതിലൂടെ ലക്ഷ്യമിടുന്നത്.

പ്രവർത്തനം

-------------------------------------------------------

ഒ.പി ബ്ലോക്കിലെ പ്രിവന്റീവ് ക്ലിനിക്കിൽ സജ്ജമാക്കിയിട്ടുള്ള പ്രത്യേക എക്സ്ചേഞ്ചിലാണ് രോഗികളുടെ ഫോൺ സന്ദേശം ആദ്യമെത്തുന്നത്. അവിടെ നിന്നു അതത് ഡിപ്പാർട്ട്മെന്റുകളിലേക്ക് സന്ദേശം കൈമാറും. രോഗികൾക്ക് ബന്ധപ്പെട്ട ഡോക്ടറുടെ മറുപടി ലഭിക്കുകയും ചെയ്യും.