തിരുവനന്തപുരം: സംസ്ഥാനത്തെ വൻകിട തോട്ടങ്ങളിൽ ജോലിചെയ്യുന്ന തൊഴിലാളികൾക്കും ചെറുകിട തോട്ടം തൊഴിലാളി ക്ഷേമനിധിയിൽ അംഗമായിട്ടുള്ളവർക്കും പൂട്ടികിടക്കുന്ന തോട്ടങ്ങളിലെ തൊഴിലാളികൾക്കും സർക്കാർ പ്രഖ്യാപിച്ച 1,000 രൂപ ധനസഹായത്തിന് രേഖകൾ നൽകണമെന്ന് ചീഫ് ഇൻസ്‌പെക്ടർ ഒഫ് പ്ലാന്റേഷൻസ് ആർ. പ്രമോദ് അറിയിച്ചു. ബന്ധപ്പെട്ട പ്ലാന്റേഷൻ ഇൻസ്‌പെക്ടർമാർക്ക് ഫോൺ/ ഇമെയിൽ വഴി ആധാർ നമ്പർ, ബാങ്ക് അക്കൗണ്ട് നമ്പർ, ബാങ്ക് ഐ.എഫ്.എസ് കോഡ് എന്നിവ നൽകണം. ചെറുകിട തോട്ടംതൊഴിലാളികളുടെയും പൂട്ടിയ തോട്ടങ്ങളിലെ തൊഴിലാളികളുടെയും വിവരങ്ങൾ ട്രേഡ് യൂണിയൻ ഭാരവാഹികൾ മുഖേനയോ, നേരിട്ടോ, തൊഴിലുടമകൾ മുഖേനയോ പ്ലാന്റേഷൻ ഇൻസ്‌പെക്ടർക്ക് നൽകണം. സാമൂഹ്യ സുരക്ഷാ പെൻഷൻ വാങ്ങുന്നവർക്ക് ആനുകൂല്യത്തിന് അർഹത ഉണ്ടായിരിക്കില്ല.