തിരുവനന്തപുരം കൊവിഡ് ഭീതിയെത്തുടർന്ന് ഗൾഫിൽ ദുരിതത്തിലായ പ്രവാസികൾക്ക് നോർക്ക റൂട്ട്സ്, പ്രവാസി ക്ഷേമനിധി ബോർഡ് എന്നിവ മുഖേന ആശ്വാസ ധനസഹായം നൽകുമെന്ന് മുഖ്യമന്ത്രി പിണറായി വിജയൻ പറഞ്ഞു. മറ്റെല്ലാ ഭിന്നതകളും മാറ്റിവച്ച് പ്രവാസി സഹോദരങ്ങളുടെ ഏത് വിഷയവും കേൾക്കാനും സാദ്ധ്യമായ ഇടപെടലുകൾ നടത്താനും ഒപ്പമുണ്ടാകും. നാം ഈ കാലത്തെ അതിജീവിക്കുക തന്നെ ചെയ്യുമെന്ന് പ്രിയപ്പെട്ട പ്രവാസി സഹോദരങ്ങളോട് പറയുകയാണ്.

ധനസഹായം ഇങ്ങനെ

 പ്രവാസി ക്ഷേമനിധി ബോർഡിൽ അംഗങ്ങളായ പെൻഷൻകാർക്ക് പെൻഷന് പുറമേ ഒറ്റത്തവണ ധനസഹായമായി ആയിരം രൂപ. പതിനയ്യായിരം പേർക്ക് ഗുണം

 ക്ഷേമനിധിയിൽ അംഗങ്ങളായ കൊവിഡ് പോസിറ്റീവ് ആയവർക്ക് 10,000 രൂപ വീതം ക്ഷേമനിധിബോർഡിന്റെ തനത് ഫണ്ടിൽ നിന്ന്

 2020 ജനുവരി ഒന്നിന് ശേഷം പാസ്‌പോർട്ട്, തൊഴിൽ വിസ എന്നിവയുമായി ബന്ധപ്പെട്ട് നാട്ടിലെത്തി തിരിച്ചുപോകാനാകാത്തവർക്കും ലോക്ക് ഡൗൺ കാലയളവിൽ വിസ കാലാവധി തീർന്നവർക്കും നോർക്കയുടെ 5000 രൂപ അടിയന്തരസഹായം

 സാന്ത്വന ചികിത്സാ രോഗങ്ങളുടെ പട്ടികയിൽ കൊവിഡ് 19നെ ഉൾപ്പെടുത്തും. ഇതിലൂടെ ക്ഷേമനിധിയിൽ അംഗങ്ങളല്ലാത്ത കൊവിഡ് പോസിറ്റീവായ പ്രവാസികൾക്ക് പതിനായിരം രൂപ