തിരുവനന്തപുരം: ലോക്ക് ഡൗൺ നിർദ്ദേശങ്ങൾ ലംഘിച്ച് നിരത്തിലിറങ്ങിയതിന് പിടിച്ചെടുത്ത വാഹനങ്ങൾ ഇന്നു മുതൽ ഉടമകൾക്ക് വിട്ടുനൽകാൻ ഡി.ജി.പി ലോക്‌നാഥ് ബെഹ്റ ജില്ലാ പൊലീസ് മേധാവികളോട് നിർദ്ദേശിച്ചു. ആവശ്യപ്പെടുമ്പോൾ വാഹനം ഹാജരാക്കാമെന്ന് എഴുതി വാങ്ങിയശേഷം സാമൂഹിക അകലം പാലിച്ചായിരിക്കും വിട്ടു നൽകുക. ആദ്യം പിടിച്ചെടുത്ത വാഹനങ്ങൾ ആദ്യം എന്ന ക്രമത്തിലായിരിക്കും വാഹനങ്ങൾ മടക്കി നൽകുന്നത്. വാഹന ഉടമകളിൽ നിന്ന് പിഴ ഈടാക്കുന്നത് സംബന്ധിച്ച് അഡ്വക്കേ​റ്റ് ജനറലിൽ നിന്ന് നിയമോപദേശം ലഭിച്ചശേഷം തീരുമാനമെടുക്കുമെന്ന് പൊലീസ് മേധാവി അറിയിച്ചു. വിലക്ക് ലംഘിച്ചതിന് മുപ്പതിനായിരത്തോളം വാഹനങ്ങളാണ് സംസ്ഥാനത്ത് ഇതുവരെ പിടിച്ചെടുത്തത്. സ്​റ്റേഷനിൽ വാഹനങ്ങൾ കൂടിയതോടെയാണ് പിഴ ഈടാക്കി വാഹനം വിട്ടുനൽകുന്നത് പൊലീസ് ആലോചിച്ചത്. ലോക്ക് ഡൗൺ ലംഘനത്തിന് 10,000 രൂപ വരെ പരമാവധി പിഴ ഈടാക്കാം.