തിരുവനന്തപുരം: കൊവിഡ് കാലത്ത് സാമൂഹ്യഅകലം പാലിച്ച് വീടുകളിൽ കഴിയുന്നവർക്ക് ഇനിമുതൽ വീട്ടിലും നഗരസഭയുടെ സേവനങ്ങൾ ലഭ്യമാകും. നഗരസഭയുമായി ബന്ധപ്പെട്ട അടിയന്തര സ്വഭാവമുള്ള സേവനങ്ങളാണ് ഓൺലൈൻ വഴിയും കോൾസെന്റർ മുഖേനയും ലഭ്യമാക്കുക. ലോക്ക് ഡൗൺ നീട്ടിയ സാഹചര്യത്തിൽ ജനങ്ങൾക്കുണ്ടാകുന്ന ബുദ്ധിമുട്ടുകൾ ഒഴിവാക്കുന്നതിന്റെ ഭാഗമായാണ് നഗരസഭ ഹെൽപ്പ് ഡസ്ക് സംവിധാനം ഒരുക്കിയതെന്ന് മേയർ.കെ. ശ്രീകുമാർ അറിയിച്ചു.
നഗരസഭയിലെ വിവിധ വകുപ്പുകളെ ഏകോപിപ്പിച്ചാണ് ഹെൽപ്പ് ഡസ്ക് പ്രവർത്തനം. കൊവിഡ് പ്രതിരോധത്തിന്റെ ഭാഗമായി നഗരസഭ ഒരുക്കിയ പ്രത്യേക കരുതൽ ആവശ്യമുള്ള വയോജനങ്ങൾ, ഭിന്നശേഷിക്കാർ, പ്രതിരോധശേഷി കുറഞ്ഞവർ എന്നിവർക്കായി നഗരസഭ ഒരുക്കിയിട്ടുള്ള ഹെൽപ്പ് ഡസ്‌കിന്റെ സേവനം വിപുലപ്പെടുത്തിയാണ് പുതിയ സംവിധാനം സജ്ജമാക്കിയത്.
പൊതുജനങ്ങൾക്ക് കോൾ സെന്റർ വഴിയും ഓൺലൈനായും ആവശ്യങ്ങൾ അറിയിക്കാം. ഇവരുടെ ആവശ്യം രജിസ്റ്റർ ചെയ്യുകയും തുടർന്ന് രജിസ്റ്റർ ചെയ്തവർക്ക് ടോക്കൺ നമ്പർ ലഭിക്കുകയും ചെയ്യും. ലഭിച്ച ടോക്കൺ നമ്പർ ഉപയോഗിച്ച് ഉന്നയിച്ച ആവശ്യത്തിന്റെ പുരോഗതിയുടെ തത്‌‌സ്ഥിതി പൊതുജനങ്ങൾക്ക് യഥാസമയം അറിയാം.
വരുന്ന തിങ്കൾ, ബുധൻ ദിവസങ്ങളിൽ രാവിലെ 11 മുതൽ 12 വരെ ജനങ്ങൾക്ക് മേയറെ നേരിട്ട് അറിയിക്കാം .രാവിലെ 10 മുതൽ വൈകിട്ട് 4 വരെയാണ് ഹെൽപ്പ് ഡെസ്‌കിന്റെ കോളുകൾ സ്വീകരിക്കുന്ന സമയം. തുടർന്നുള്ള സന്ദേശങ്ങൾ വാട്സ് ആപ്പ് വഴിയോ www.covid19tvm.com എന്ന വെബ്സൈറ്റ് വഴിയോ അറിയിക്കാം. ഓൺലൈനായും കോൾസെന്റർ വഴിയും പൊതുജനങ്ങൾ ആവശ്യപ്പെടുന്ന സേവനങ്ങൾ, അടിയന്തര സ്വഭാവമുള്ള പരാതികൾ എന്നിവ തരംതിരി ച്ച് വിവിധ വകുപ്പ് മേധാവികൾക്ക് കൈമാറി പരിഹരിക്കും. ഹെൽപ്പ് ഡെസ്‌ക് നമ്പറുകൾ - 9496434409, 9496434410