അബുദാബി: കൊവിഡിൻെറ പശ്ചാത്തലത്തിൽ 50 വയസു കഴിഞ്ഞ തൊഴിലാളികളെ സ്വന്തം രാജ്യങ്ങളിലേക്ക് അയക്കാമെന്ന് അബുദാബി എക്കണോമിക് ഡെവലപ്‌മെന്റ് ഡിപ്പാർട്ട്‌മെന്റ് വ്യക്തമാക്കി. യാത്രാ ചെലവുകൾ അടക്കം തൊഴിൽ ഉടമകൾ നൽകണം. ജീവനക്കാർക്ക് ആവശ്യമായ അവധി നൽകാനും കമ്പനികൾക്ക് നിർദേശം നൽകി. സ്വന്തം രാജ്യങ്ങളിലേക്ക് മടങ്ങാൻ ആഗ്രഹിക്കുന്ന 50 വയസിന് മുകളിലുള്ള ജീവനക്കാരുടെ വിവരങ്ങൾ അറിയാൻ അബുദാബിയിലെ കമ്പനികളിൽ സർവേ ആരംഭിച്ചിരുന്നു.

യു.എ.ഇയിലെ തൊഴിൽ അവകാശങ്ങൾ പൂർണമായും പ്രയോജനപ്പെടുത്തിക്കൊണ്ട് നാട്ടിലേക്കുള്ള വിമാനടിക്കറ്റ് അടക്കം നൽകിയാണ് ജീവനക്കാർക്ക് മടങ്ങാനുള്ള അവസരം ഒരുക്കുക.

കൊവിഡ് ലക്ഷണങ്ങളുള്ളവർക്ക് പരിശോധനയ്ക്കായി എത്താമെന്നും വിസ മാനദണ്ഡങ്ങൾ പ്രശ്നമല്ലെന്നുമാണ് അധികൃതർ അറിയിച്ചിരിക്കുന്നത്. മുസാഫ 12, മുസാഫ 43 എന്നിവിടങ്ങളിലാണ് പരിശോധനയ്ക്കുള്ള സംവിധാനങ്ങൾ തയ്യാറാക്കിയത്. രണ്ട് സ്ഥലങ്ങളിൽ കൊവിഡ് പരിശോധന സംവിധാനങ്ങളും ഒരുക്കിയിട്ടുണ്ട്.