ന്യൂഡൽഹി: കൊവിഡ് മൂലം മാറ്റിവച്ച യു.പി.എസ്.സി, എസ്.എസ്.സി പരീക്ഷകൾ ലോക്ക്ഡൗണിനുശേഷം നടത്തുമെന്ന് കേന്ദ്രമന്ത്രി ജിതേന്ദ്ര സിംഗ് വ്യക്തമാക്കി. എല്ലാ ഉദ്യോഗാർത്ഥികൾക്കും അവരുടെ നിയുക്ത പരീക്ഷാകേന്ദ്രങ്ങളിൽ എത്താൻ മതിയായ സമയം നൽകുന്ന തരത്തിലാണ് തീയതി തീരുമാനിക്കുക.പരീക്ഷകൾ റദ്ദാക്കുമെന്നുള്ള വാർത്തകൾ ശരിയല്ല, മാറ്റിവച്ച പരീക്ഷകൾ പുതിയ തീയതികളിൽ നടത്തുമെന്നും അദ്ദേഹം അറിയിച്ചു.
രാജ്യത്ത് ലോക്ക്ഡൗൺ പ്രഖ്യാപിക്കുന്നതിന് മുൻപ് തന്നെ സിവിൽ സർവീസ്, എൻജിനീയറിംഗ് സർവീസ്, ജിയോളജിസ്റ്റ് സർവീസ് പരീക്ഷാ തീയതികൾ നിശ്ചയിച്ച് കഴിഞ്ഞിരുന്നു. ഈ തീയതികളിൽ മാറ്റമുണ്ടെങ്കിൽ യു.പി.എസ്.സി വൈബ്‌സൈറ്റിൽ പ്രസിദ്ധീകരിക്കും. കമ്പയിൻഡ് മെഡിക്കൽ സർവീസസ്, ഇന്ത്യൻ ഇക്കണോമിക് സർവീസ്, ഇന്ത്യൻ സ്റ്റാറ്റിസ്റ്റിക്കൽ സർവീസ്, എൻ.ഡി.എ തുടങ്ങിയ പരീക്ഷകളാണ് യു.പി.എസ്.സി മാറ്റിവച്ചത്.