ചെന്നൈ: ചെന്നൈയിലെ ഒരു മാദ്ധ്യമപ്രവർത്തകന് കൊവിഡ് സ്ഥിരീകരിച്ചു.

ആരോഗ്യ വകുപ്പ് സെക്രട്ടറിയുടെ ദിവസേനയുള്ള വാർത്താ സമ്മേളനത്തിലടക്കം ഇദ്ദേഹം പങ്കെടുത്തിട്ടുണ്ട്. ഇതോടെ ആരോഗ്യ വകുപ്പ് സെക്രട്ടറിയും ഓഫീസിലുള്ളവരും മാദ്ധ്യമ പ്രവർത്തകരും പരിഭ്രാന്തിയിലാണ്. രോഗലക്ഷണങ്ങൾ കണ്ടതിനെ തുടർന്ന് സ്വയം പരിശോധനയ്ക്ക് വിധേയമാവുകയായിരുന്നു. രോഗം സ്ഥിരീകരിച്ചതോടെ ചെന്നൈയിലെ രാജീവ് ഗാന്ധി ആശുപത്രിയിൽ പ്രവേശിപ്പിച്ചു.

ഇയാൾ താമസിച്ച കെട്ടിടത്തിലെ 50 പേരെ നിരീക്ഷണത്തിലാക്കി. കൊവിഡ് സ്ഥിരീകരിച്ചവരുമായി ഇദ്ദേഹം സമ്പർക്കം പുലർത്തിയിട്ടില്ലെന്നാണ് അറിയുന്നത്. എവിടെ നിന്ന് രോഗം പിടിപെട്ടു എന്നതിനും നിശ്ചയമില്ല. ഇദ്ദേഹം ഇടപെട്ട ആളുകളെ കണ്ടെത്തി അവരെയെല്ലാം നിരീക്ഷണത്തിലാക്കാനുള്ള ശ്രമം നടന്നുവരികയാണ്.