കൊല്ലം: ലോകത്തെയാകെ പിടികൂടിയ കൊവിഡ് മഹാമാരിക്കെതിരെ കേരളം തീർത്ത സാമൂഹ്യ പ്രതിരോധത്തിന് ആദരം അർപ്പിച്ചു കൊണ്ട് ശൂരനാട് സാംസ്‌കാരിക കൂട്ടായ്മ തയ്യാറാക്കിയ ഗാനം ദൈവത്തിന്റെ സ്വന്തം നാട്ടിലെ അതിജീവനത്തിന്റെ നേർസാക്ഷ്യം പങ്കുവയ്ക്കുന്നു. "നമ്മൾ പൊരുതും നമ്മൾ ജയിക്കും" എന്ന ഗാനം കൊവിഡ് പ്രതിരോധത്തിൽ നിസ്തുല സേവനം നടത്തി വരുന്ന ആരോഗ്യ പ്രവർത്തകർക്കും നിയമപാലകർക്കും പ്രണാമം അർപ്പിക്കുകയാണ്.

ലോക്ക് ഡൗണിന്റെ എല്ലാ പരിമിതികൾക്കുള്ളിൽ നിന്നുമാണ് ഗാനം തയ്യാറാക്കിയത്. പതാരം സ്കൂളിലെ അദ്ധ്യാപകനായ പി.ജി സുനിൽ കുമാർ രചനയും, സംഗീത സംവിധായകനായ മുഹമ്മദ് റാഫി സംഗീതവും നൽകിയിരിക്കുന്നു. അസിം സലിമാണ് ഗാനം ആലപിച്ചിരിക്കുന്നത്.

ഇരുളടഞ്ഞ പ്രതീക്ഷ നശിച്ച നാളുകളിൽ നിന്നും ജ്വലിക്കുന്ന താരകമായി ഉയരുന്ന കേരളത്തിന്റെ കുറ്റമറ്റ രോഗ പ്രതിരോധ സംവിധാനങ്ങളേയും നിരാലംബർക്ക് ഭക്ഷണപ്പൊതികൾ വിതരണം ചെയ്യുന്ന സാംസ്കാരിക പ്രവർത്തകരേയും നന്ദിപൂർവ്വം സ്മരിക്കുന്ന ഗാനത്തിന്റെ ക്രീയാത്മക സംവിധാനം നിർവ്വഹിച്ചിരിക്കുന്നത് നന്ദുപത്മകുമാറാണ്. അതിജീവനത്തിന്റെ പാതയിൽ കരുത്തോടെ മുന്നേറുന്ന കേരള ജനതയ്ക്ക് ഊർജ്ജം പകരുന്ന ഗാനം ഇതിനോടകം പ്രേക്ഷകശ്രദ്ധ പിടിച്ച് പറ്റി. സാമൂഹിക പ്രതിബദ്ധത ഉയർത്തിപ്പിടിച്ച് ഇതിനോടകം ഹിറ്റായ ഗാനം പ്രശസ്ത സിനിമാ സംവിധായകനായ വൈശാഖ് ഫേസ് ബുക്ക് പേജിലൂടെയാണ് റിലീസ് ചെയ്തത്.