ഒക്‌ലഹോമ സിറ്റി: അമേരിക്കയിൽ ഒക്‌ലഹോമ സംസ്ഥാനത്തിന്റെ തെക്കൻ മേഖല, ടെക്സസ്, ലൂസിയാന ഭാഗങ്ങളിൽ വീശിയടിച്ച ശക്തമായ ചുഴലിക്കാറ്റിലും ഇടിമിന്നലോടു കൂടിയ മഴയിലും ഏഴ് പേർ മരിച്ചു. നിരവധി പേർക്ക് പരിക്കേറ്റതായി റിപ്പോർട്ട്. ബുധൻ, വ്യാഴം ദിവസങ്ങളിൽ മേഖലയിൽ ശക്തമായ ഇടിമിന്നലോടുകൂടിയ മഴയും വെള്ളപ്പൊക്കവും ചുഴലിക്കാറ്റും റിപ്പോർട്ട് ചെയ്തിരുന്നു. ടെക്സാസിലും ഒക്‌ലഹോമയിലുമായി ചുഴലിക്കാറ്റിലാണ് അഞ്ചുപേർ മരിച്ചത്. ലൂസിയാനയിൽ ഒരാൾ ചുഴലിക്കാറ്റിലും മറ്റൊരാൾ വെള്ളപ്പൊക്കത്തിലുമാണ് മരിച്ചത്. ഇന്നും മോശം കാലാവസ്ഥയാണ് ഈ പ്രദേശങ്ങളിലുണ്ടാവുകയെന്നാണ് മുന്നറിയിപ്പ്.

പ്രാദേശിക സമയം വ്യാഴാഴ്ച ഉച്ച മുതൽ തെക്കൻ യു.എസിലെ 100,000 ലേറെ വീടുകളിൽ വൈദ്യുതബന്ധം വിച്ഛേദിക്കപ്പെട്ടു. നിരവധി വീടുകൾ തകർന്നിട്ടുണ്ട്. മിസിസിപ്പി സംസ്ഥാനത്തും ചുഴലിക്കാറ്റുകൾ റിപ്പോർട്ട് ചെയ്തു. തെക്കൻ യു.എസ് സംസ്ഥാനങ്ങൾക്ക് ശക്തമായ ചുഴലിക്കാറ്റ് മുന്നറിയിപ്പ് നൽകിയിട്ടുണ്ട്. ഈ മാസം ആദ്യം തെക്കൻ യു.എസിൽ തന്നെ മഴയിലും ചുഴലിക്കാറ്റിലുമായി 26 പേരാണ് മരിച്ചത്. ഈ വർഷം ഇതേവരെ യു.എസിൽ ചുഴലിക്കാറ്റിൽപ്പെട്ട് മരിച്ചത് 74 പേരാണ്.