തിരുവനന്തപുരം: നാലു മണിക്കൂർ കൊണ്ട് തിരുവനന്തപുരത്തു നിന്ന് കാസർകോ‌ട്ടെത്താവുന്ന സെമി-ഹൈസ്പീഡ് റെയിലിന്റെ രൂപരേഖ മന്ത്രിസഭാ യോഗത്തിന്റെ അനുമതിക്കായി സമർപ്പിച്ചു. പൈതൃക സ്ഥാപനങ്ങളെയും ആരാധനാലയങ്ങളെയും ഒഴിവാക്കാൻ സാദ്ധ്യതാ രൂപരേഖയിൽ പത്തുമുതൽ 50 മീറ്റർ വരെ മാറ്റം വരുത്തിയിട്ടുണ്ട്.
തിരുവനന്തപുരം, കൊല്ലം, ചെങ്ങന്നൂർ, കോട്ടയം, എറണാകുളം, നെടുമ്പാശ്ശേരി വിമാനത്താവളം, തൃശൂർ, തിരൂർ, കോഴിക്കോട്, കണ്ണൂർ, കാസർകോട് എന്നിവിടങ്ങളിലാണ് സ്റ്റേഷനുകൾ.
റെയിൽപാത
തിരുവനന്തപുരം കൊച്ചുവേളിയിൽ തുടങ്ങി കഴക്കൂട്ടം, ആറ്റിങ്ങൽ, കല്ലമ്പലം, പാരിപ്പള്ളി, കൊട്ടിയം, മുഖത്തല, കുണ്ടറ, തെങ്ങമം, നൂറനാട്, മുതുകാട്ടുകര, കിടങ്ങയം, കൊഴുവല്ലൂർ, മുളക്കുഴ വഴി ചെങ്ങന്നൂരിൽ .പിരളശ്ശേരി എൽ.പി.സ്‌കൂളിനുസമീപം വല്ലന റോഡിലാണ് ചെങ്ങന്നൂരിലെ സ്റ്റേഷൻ.
നെല്ലിക്കൽ കോയിപ്പുറം, നെല്ലിമല, ഇരവിപേരൂർ, കല്ലൂപ്പാറ, മുണ്ടിയപ്പള്ളി, മാടപ്പള്ളി, വാകത്താനം, വെള്ളൂത്തുരുത്തി, പാറയ്ക്കൽ കടവ്, കൊല്ലാട്, കടുവാക്കുളം വഴി കോട്ടയത്തേക്ക്. കോട്ടയം റെയിൽവേ സ്റ്റേഷനു തെക്ക് മുട്ടമ്പലം ദേവലോകം ഭാഗത്താണ് പുതിയ സ്റ്റേഷൻ. കോട്ടയത്തുനിന്ന് എറണാകുളം കാക്കനാട്ടേക്ക്. അവിടെനിന്ന് നെടുമ്പാശ്ശേരി എയർപോർട്ട്, തൃശൂർ വഴി തിരൂരിൽ എത്തും. തിരൂർ മുതൽ റെയിൽ പാതയ്ക്ക് സമാന്തരം.