തിരുവനന്തപുരം: വിദേശരാജ്യങ്ങളിൽ കുടുങ്ങി കേരളത്തിലേക്ക് മടങ്ങാൻ ആഗ്രഹിക്കുന്ന പ്രവാസികൾക്കായി നോർക്ക രജിസ്‌ട്രേഷൻ ഉടൻ ആരംഭിക്കും. ഗർഭിണികൾ, കൊറോണ ഒഴികെയുള്ള രോഗങ്ങൾ കൊണ്ട് വലയുന്നവർ, വിസാ കാലാവധി കഴിഞ്ഞവർ, സന്ദർശക വിസയിലെത്തി കുടുങ്ങിപോയവർ , വിദ്യാർത്ഥികൾ എന്നിവർക്കാണ് ആദ്യപരിഗണന. WWW. NORKAROOTS.ORG എന്ന വെബ്‌സ്‌റ്റൈലിലാണ് രജിസ്റ്റർ ചെയ്യേണ്ടത്.ലിങ്ക് ഇന്നലെ അർദ്ധരാത്രിയോടെ ആക്ടീവാകുമെന്ന പറഞ്ഞിരുന്നെങ്കിലും ഇതുവരെ പ്രവർത്തനക്ഷമമായിട്ടില്ല. ഉടൻ തന്നെ ലിങ്കിൽ റജിസ്റ്റർ ചെയ്യാനാവും എന്നാണ് അധികൃതർ നൽകുന്ന സൂചന. ആദ്യം രജിസ്റ്റർ ചെയ്യുന്നവർക്ക് മുൻഗണന ഇല്ലാത്തതിനാൽ ആരും തിരക്കു കൂട്ടേണ്ടെന്ന് അധികൃതർ പറയുന്നത്.

മടങ്ങാനാഗ്രഹിക്കുന്നവർ ആദ്യ പടിയായി നോർക്കയിൽ രജിസ്റ്റർ ചെയ്യുകയാണ് വേണ്ടത്. ഒപ്പം കൊവിഡ് നെഗറ്റീവ് ആണെന്ന സർട്ടിഫിക്കറ്റും ഹാജരാക്കണം. സർക്കാർ എല്ലാ വിധ സൗകര്യങ്ങളും മടങ്ങിവരുന്ന പ്രവാസികൾക്കായി ഒരുക്കിയിട്ടുണ്ട്. മൂന്നര ലക്ഷം മുതൽ അഞ്ചു ലക്ഷം വരെ പ്രവാസികൾ മടങ്ങിയെത്തുമെന്നാണ് പ്രതീക്ഷിക്കുന്നത്. രണ്ട് ലക്ഷം പേർക്ക് വേണ്ട ക്വാറന്റൈൻ സൗകര്യം ഒരുക്കിയിട്ടുണ്ട്.നിരീക്ഷണത്തിനുശേഷമായിരിക്കും ഇവരെ വീടുകളിലേക്ക് വിടുന്നത്.