വർക്കല: പുത്തൻ ചന്തയിൽ കൊവിഡ് സ്ഥിരീകരിച്ചയാളുടെ അടുത്ത ബന്ധുക്കളായ 7 പേരുടെ പരിശോധനാഫലം നെഗറ്റീവാണെന്ന് അഡ്വ. വി.ജോയി എം.എൽ.എ അറിയിച്ചു. അടുത്ത ബന്ധുക്കളായ ഒൻപതുപേരുടെ സാമ്പിളുകൾ പരിശോധനയ്ക്ക് വിധേയമാക്കിയതിൽ 7 പേരുടെ ഫലമാണ് പുറത്ത് വന്നത്. തിരുവനന്തപുരം മെഡിക്കൽ കോളേജിൽ നടത്തിയ പരിശോധനയിലാണ് കൊവിഡ് ബാധിച്ചയാളുടെ ഭാര്യ, മൂന്ന് മക്കൾ, ഭാര്യാ സഹോദരൻ, ഇദ്ദേഹത്തിന്റെ ഭാര്യ, മകൾ എന്നിവരുടെ ഫലം നെഗറ്റീവാണെന്ന് തെളിഞ്ഞത്. വർക്കല നഗരസഭാ പരിധിയിൽ 114 പേർ നിരീക്ഷണത്തിലാണ്. നഗരപ്രദേശവും വെട്ടൂർ ഗ്രാമപഞ്ചായത്തും ഹോട്ട് സ്പോട്ട് ആയതിനാൽ പൊലീസിന്റെ പരിശോധന കർശനമാക്കിയിട്ടുണ്ടെന്നും പൊതുജനങ്ങൾ മാസ്ക് ഉപയോഗിക്കണമെന്നും എം.എൽ.എ പറഞ്ഞു.