സോൾ : കാര്യം, ലോക കണ്ട ഏറ്റവും ഭീകരനായ സ്വേച്ഛാധിപതിമാരിൽ ഒരാളായിരുന്നെങ്കിലും സ്വന്തം ആരോഗ്യത്തിന്റെ കാര്യത്തിൽ ഉത്തരകൊറിയൻ രാഷ്ട്രത്തലവൻ കിം ജോംഗ് ഉന്നിന് യാതൊരു ശ്രദ്ധയുമില്ലായിരുന്നു. ഒരു ശരാശരി സുമോ ഗുസ്തിക്കാരന്റെ ഭാരമുണ്ടായിരുന്നു കിമ്മിന്. ചിമ്മിനിയിലേതു പോലുള്ള പുകവലി. വിലകൂടിയ വിദേശ മദ്യം കണ്ടാൽ വെള്ളം കുടിക്കുന്ന പോലെയാണ് അകത്താക്കുന്നത്. പിന്നെ കുടുംബ പാരമ്പര്യമായി കിട്ടിയ ഹൃദ്രോഗം, ഉയർന്ന രക്ത സമ്മർദ്ദം, പ്രമേഹം തുടങ്ങിയവയും.

37 വയസുള്ള കിമ്മിന് ഏകദേശം 136 കിലോഗ്രാം ഭാരമുണ്ടെന്നാണ് പറയുന്നത്. അഞ്ചടി ആറിഞ്ച് ഉയരവും. ചെയിൻ സ്മോക്കറായ കിം ഒരു ദിവസം നാല് പായ്ക്കറ്റ് വരെ സിഗററ്റ് ഉപയോഗിക്കുമെന്നാണ് വിവരം. ചീസ്, വൈൻ എന്നിവയോട് കിമ്മിന് വലിയ ഇഷ്‌ടമാണത്രെ. ഇതേപറ്റി നിരവധി തവണ ദക്ഷിണ കൊറിയൻ മാദ്ധ്യമങ്ങളിലും മറ്റും രസകരമായ വാർത്തകളുണ്ടായിട്ടുണ്ട്. സ്വിറ്റ്സർലൻഡിൽ നിന്നും തനിക്ക് ഇഷ്ടപ്പെട്ട ചീസ്, കിം ഓർഡർ ചെയ്തിരുന്നു. അമിത അളവിൽ ചീസ് കഴിക്കുന്ന കിമ്മിന് ഡോക്ടർമാർ ഉപദേശം നൽകിയിരുന്നെങ്കിലും കിം അതൊന്നും കേൾക്കാറേയില്ലായിരുന്നു. പ്രതിവർഷം 300 കേടിയോളം രൂപയുടെ വിദേശ മദ്യമാണ് കിം ഉത്തര കൊറിയയിൽ ഇറക്കുമതി ചെയ്യിപ്പിക്കുന്നത്. റഷ്യൻ വോഡ്ക, ഫ്രഞ്ച് കോന്യാക് ബ്രാൻഡുകളാണ് ഇവയിൽ കൂടുതലും. ഫാസ്റ്റ് ഫുഡ് ശീലമാണ് കിമ്മിനെ പൊണ്ണത്തടിയനാക്കി മാറ്റിയത്. തടിയും പ്രമേഹവും കിമ്മിന് നിരവധി ആരോഗ്യ പ്രശ്നങ്ങൾക്ക് കാരണമായിട്ടുണ്ട്. 2012ൽ കണങ്കാലിലുണ്ടായ മുഴയെ തുടർന്ന് കിം ഓപ്പറേഷന് വിധേയനായിരുന്നു.

കിമ്മിന്റെ അച്ഛൻ കിം ജോംഗ് ഇൽ 2011ൽ ഹൃദയാഘാതത്തെ തുടർന്ന് 70ാം വയസിലാണ് അന്തരിച്ചത്. ഇദ്ദേഹത്തിന്റെ പിതാവും ഉത്തര കൊറിയയുടെ സ്ഥാപകനുമായ കിം ഇൽ സൂംഗ് 82ാം വയസിൽ മരിച്ചതിന് കാരണവും ഹൃദയാഘാതമാണ്. 1948 മുതൽ 1994ൽ മരിക്കുന്നത് വരെ കിം ഇൽ സൂംഗ് ആയിരുന്നു ഉത്തര കൊറിയയുടെ ഏകാധിപതി. അദ്ദേഹത്തിന്റെ മരണ ശേഷമാണ് കിം ജോംഗ് ഇൽ ഭരണമേറ്റെടുത്തത്. മകൻ കിമ്മിനെ പോലെ തന്നെ അച്ഛൻ കിം ജോംഗ് ഇല്ലിനും കടുത്ത പുകവലി ശീലവും പ്രമേഹവുമൊക്കെ ഉണ്ടായിരുന്നു.

90കളിൽ തന്റെ പ്രിയപ്പെട്ട സിഗരറ്റ് ബ്രാൻഡായ ആഫ്രിക്കൻ പുകയില കൊണ്ട് നിർമിച്ച റോത്ത്മാൻസിന്റെ പകർപ്പുകൾ നിർമിക്കാൻ ശാസ്ത്രജ്ഞരെ ഇൽ നിയോഗിക്കുകയുണ്ടായി. അന്നേരം നൂറ് കണക്കിന് ഉത്തര കൊറിയക്കാർ പട്ടിണി മൂലം മരിച്ച സമയമായിരുന്നുവെന്ന് കുറച്ച് വർഷങ്ങൾക്ക് മുമ്പ് നടന്ന ഒരു മനുഷ്യാവകാശ സമ്മേളനത്തിൽ കിം ഹൈയോംഗ്സൂ എന്ന ജീവശാസ്ത്രജ്ഞൻ വെളിപ്പെടുത്തിയിരുന്നു. കടുത്ത മദ്യപാനിയായിരുന്ന ഇല്ലിന് ഫാസ്റ്റ് ഫുഡിനോടായിരുന്നു പ്രിയം. ഇല്ലിന്റെ 17 വർഷത്തെ ഭരണ കാലയളവിനിടെ ലോകത്തെ ഏറ്റവും കൂടുതൽ ഹെന്നെസി പാരഡിസ് കോന്യാക് എന്ന വിദേശമദ്യം ഇറക്കുമതി ചെയ്തിരുന്നത് രാജ്യമായി ഉത്തരകൊറിയ മാറി. മക്ഡൊണാൾഡ് ഉത്പന്നങ്ങൾ രാജ്യത്തെത്തിക്കാൻ പ്രത്യേക ഉദ്യോഗസ്ഥരെ ഇൽ ചൈനയിലേക്ക് അയച്ച ചരിത്രവുമുണ്ട്. ഇൽ അപ്രത്യക്ഷമാകുമ്പോഴെല്ലാം അദ്ദേഹത്തിന്റെ ആരോഗ്യസ്ഥിതിയെ പറ്റിയാണ് അഭ്യൂഹങ്ങൾ പ്രചരിച്ചിരുന്നത്.

2007ൽ ഒരിടവേളയ്ക്ക് ശേഷം പൊതുജനങ്ങൾക്ക് മുന്നിൽ പ്രത്യക്ഷപ്പെട്ട ഇൽ മെലിഞ്ഞ് ക്ഷീണിതനായാണ് കാണപ്പെട്ടത്. ഇല്ലിന് ഹൃദയാഘാതമുണ്ടായതായി അന്ന് നിരവധി റിപ്പോർട്ടുകളുണ്ടായിരുന്നു. 2008ൽ ഇല്ലിന് സ്ട്രോക്ക് ഉണ്ടായപ്പോൾ ചികിത്സിച്ചത് ചൈനീസ്, ഫ്രഞ്ച് ഡോക്ടർമാരാണെന്ന് ദക്ഷിണ കൊറിയൻ മാദ്ധ്യമങ്ങൾ വെളിപ്പെടുത്തിയിരുന്നു. മൂന്ന് വർഷങ്ങൾക്ക് ശേഷം ഹൃദയാഘാതം മൂലമാണ് ഇൽ മരിച്ചത്. എന്നാൽ പ്രമേഹ സംബന്ധമായ രോഗങ്ങളെ തുടർന്ന് ഇതിനുമുമ്പ് തന്നെ ഇൽ മരിച്ചിരിക്കാമെന്ന് വാദിക്കുന്നവരുമുണ്ട്.