തിരുവനന്തപുരം:ജില്ലയ്ക്ക് ആശ്വാസമായി ചികിത്സയിലുണ്ടായിരുന്ന അവസാന രോഗിയും രോഗമുക്തി നേടി. വർക്കല പുത്തൻചന്ത സ്വദേശിയായ 44കാരനാണ് അസുഖം ഭേദമായത്. ഇന്നലെ പുതിയ കേസുകളൊന്നും റിപ്പോർട്ട് ചെയ്യാതിരുന്നതോടെ ജില്ല കൊവിഡ് മുക്തമായി. അതേസമയം ഇന്നലെ പുതുതായി 195 പേർ കൂടി നിരീക്ഷണത്തിലായി. 146 പേർ നിരീക്ഷണ കാലയളവ് പൂർത്തിയാക്കി. ഇന്നലെ രോഗലക്ഷണങ്ങളോടെ 11 പേരെ ആശുപത്രയിൽ പ്രവേശിപ്പിച്ചു.10 പേരെ ഡിസ്ചാർജ് ചെയ്തു. ആകെ 2025 പേരാണ് ജില്ലയിൽ നിരീക്ഷണത്തിലുള്ളത്. ഇവരിൽ 1875 പേർ വീടുകളിലാണ്. ഇന്നലെ 47 സാമ്പിളുകൾ പരിശോധനയ്ക്കായി അയച്ചു. ഇന്നലെ ലഭിച്ച 70 പരിശോധനാഫലവും നെഗറ്റീവാണ്.

മെഡിക്കൽ കോളേജിൽ 37 പേരും ജനറൽ ആശുപത്രിയിൽ 6 പേരും എസ്.എ.റ്റി ആശുപത്രിയിൽ 4 പേരും ചേരൂർക്കട മാനസികാരോഗ്യ കേന്ദ്രത്തിൽ ഒരാളും വിവിധ സ്വകാര്യ ആശുപത്രികളിൽ 14 പേരും ഉൾപ്പെടെ 62 പേരാണ് വിവിധ ആശുപത്രികളിലായി ചികിത്സയിലുള്ളത്. വിവിധ സ്ഥലങ്ങളിലായി നടന്ന വാഹനപരിശോധനകളിലായി 8104 പേരെ സ്ക്രീനിംഗ് ചെയ്തു.

 ആകെ നിരീക്ഷണത്തിലുള്ളവർ - 2,025
 വീടുകളിൽ നിരീക്ഷണത്തിലുള്ളവർ - 1,875
 ആശുപത്രികളിൽ നിരീക്ഷണത്തിലുള്ളവർ - 62
 കോവിഡ് കെയർ സെന്ററുകളിലുള്ളവർ - 88
 ഇന്നലെ പുതുതായി നിരീക്ഷണത്തിലായവർ - 195