തിരുവനന്തപുരം: കേരള സർവകലാശാലയുടെ കാര്യവട്ടം കാമ്പസിൽ 20 ഏക്കറിൽ നെല്ലും അഞ്ചേക്കറിൽ കിഴങ്ങ് വർഗങ്ങളും കൃഷി ചെയ്യാൻ സിൻഡിക്കേറ്ര് യോഗം തീരുമാനിച്ചു. ലോക്ക് ഡൗൺ കാലത്ത് സർവകലാശാല ഹോസ്​റ്റലുകളിൽ തങ്ങേണ്ടി വന്ന വിദ്യാർഥികൾക്ക് ഹോസ്​റ്റൽ ഫീസിൽ പൂർണ ഇളവ് നൽകും.

സർവകലാശാല സസ്യശാസ്ത്ര പരിസ്ഥിതി വകുപ്പുകളാണ് കൃഷിക്ക് നേതൃത്വം നൽകുന്നത്. വിദ്യാർഥികളുടെ പങ്കാളിത്തത്തോടുകൂടി ആയിരിക്കും കൃഷി. കാർഷികവൃത്തിയിൽ ഏർപ്പെടുന്നതിന് സ്വയം സന്നദ്ധരായി വരുന്ന വിദ്യാർത്ഥികൾക്ക് കാർഷിക ഫെലോഷിപ്പ് ഏർപ്പെടുത്തും. സർവകലാശാലയുടെ അഫിലിയേ​റ്റഡ് കോളേജുകളിൽ കമ്മ്യൂണി​റ്റി ഫാർമിംഗ് ക്ലബ്ബുകൾ രൂപീകരിക്കും. കൃഷിയിൽ മികച്ച പ്രവർത്തനം കാഴ്ചവയ്ക്കുന്ന കോളജുകൾക്ക് ഹരിതാലയം അവാർഡ് ഏർപ്പെടുത്തും. എൻ.എസ്.എസിനെ വരും വർഷങ്ങളിൽ പൂർണമായും കൃഷിയുമായി ബന്ധപ്പെട്ട പ്രവർത്തനങ്ങൾക്ക് നിയോഗിക്കും. കോളേജുകളിലെ സന്നദ്ധ സേനയും പാലിയേ​റ്റീവ് അംഗങ്ങളും യോചിച്ച് രക്തദാനം നടത്തും.
കാര്യവട്ടം കാമ്പസിലെ കമ്യൂണി​റ്റി ലബോറട്ടറിപ്രവർത്തിപ്പിക്കാനും ആരോഗ്യ ശുചിത്വ സംരക്ഷണ സാമഗ്രികൾ കൂടുതലായി ഉത്പാദിപ്പിക്കാനും തീരുമാനിച്ചു. കൊവിഡ് പ്രതിരോധ പ്രവർത്തനങ്ങൾക്കായി സർവകലാശാലയുടെ സാങ്കേതിക ഉപകരണങ്ങൾ സർക്കാരിന് വിട്ടു നൽകും.