ആലപ്പുഴ: അടച്ചിട്ടിരിക്കുന്ന ഹോട്ടലുകളുടേയും റെസ്റ്റോറന്റുകളുടേയും ലോക്ക്‌ഡൗൺ കാലത്തെ വൈദ്യുതി ചാർജ് ഒഴിവാക്കണമെന്ന്‌ കേരള ഹോട്ടൽ ആൻഡ്‌ റെസ്റ്റോറന്റ് അസോസിയേഷൻ സംസ്ഥാന കമ്മിറ്റി ആവശ്യപ്പെട്ടു. അടഞ്ഞു കിടക്കുന്ന കാലയളവിലേയും വൈദ്യുതി നിരക്ക് അടയ്ക്കണമെന്ന്‌ നിർദേശിച്ച്‌ ഹോട്ടലുടമകൾക്ക് കെ.എസ്.ഇ.ബി ബില്ല് നൽകിയിട്ടുണ്ട്. ഹോട്ടലുകൾ അടച്ചിട്ടതിനാൽ വരുമാനമൊന്നുമില്ലാതായ ഹോട്ടലുടമകൾക്ക് വൈദ്യുതി ബില്ല് അടക്കാനുള്ള നിവൃത്തിയില്ല. ലോക്ക്ഡൗണിന്‌ ശേഷം വ്യാപാരം പുനരാരംഭിച്ചാലും പഴയനിലയിലാകണമെങ്കിൽ കാലങ്ങളെടുക്കും. ചെറുകിട ഇടത്തരം ഹോട്ടൽ മേഖലയിലെ വൈദ്യുതി ചാർജ് കുറഞ്ഞത് മൂന്ന് മാസത്തേക്കെങ്കിലും ഒഴിവാക്കുകയോ വൈദ്യതി ചാർജ് അടയ്ക്കാൻ ആറ് മാസത്തെ സാവകാശം നൽകുകയോ വേണമെന്ന് പ്രസിഡന്റ്‌ മൊയ്തീൻകുട്ടി ഹാജിയും ജനറൽ സെക്രട്ടറി ജി.ജയപാലും ആവശ്യപ്പെട്ടു.