ചേർത്തല:ചേർത്തല ജോയിന്റ് ആർ.ടി ഓഫീസിലെ മോട്ടോർ വെഹിക്കിൾ ഇൻസ്പെക്ടർ കെ.ജി. ബിജുവിനെ ജോലിക്കിടെ കൈയേ​റ്റം ചെയ്ത കേസിൽ ആർ.ടി ഏജന്റ് തുറവൂർ തിരുമല പുത്തൻ തറയിൽ തമ്പിയെ (51) ചേർത്തല പൊലീസ് അറസ്​റ്റ് ചെയ്തു. ജോയിന്റ് ആർ.ടി ഓഫീസിൽ 2019 ഒക്ടോബർ 24 നായിരുന്നു സംഭവം. ഓഫീസിൽ പൊതുജനങ്ങൾക്ക് തടസമായി നിന്ന് അപേക്ഷ പൂരിപ്പിച്ച തമ്പിയോട് മാറി നിൽക്കാൻ ബിജു ആവശ്യപ്പെടുകയും തുടർന്നുണ്ടായ തർക്കത്തിനിടെ ബിജുവിനെ കൈയേ​റ്റം ചെയ്‌തെന്നുമാണ് കേസ്.സംഭവത്തെ തുടർന്ന് ഇരുവരും ആശുപത്രിയിൽ ചികിത്സ തേടിയിരുന്നു. സർക്കാർ ഉദ്യോഗസ്ഥന്റെ ജോലി തടസപ്പെടുത്തൽ,കൈയേ​റ്റം ചെയ്യൽ എന്നീ വകുപ്പുകൾ പ്രകാരമാണ് പൊലീസ് കേസെടുത്തത്.കോടതിയിൽ ഹാജരാക്കിയ പ്രതിയെ ജാമ്യത്തിൽ വിട്ടു.