ആലപ്പുഴ: കൊമ്മാടിയിൽ സാനിട്ടൈസർ കയറ്റി വന്ന ഗുഡ്സ് ട്രാവലർ കനാലിലേക്ക് മറിഞ്ഞു. ഡ്രൈവറും സഹായിയും നിസാര പരിക്കുകളോടെ രക്ഷപ്പെട്ടു. ഇവർ ജനറൽ ആശുപത്രിയിൽ ചികിത്സയിലാണ്. അരൂർ ആറാം വാർഡിൽ ചക്കാലയ്ക്കൽ ബൈജു (32), തൃപ്പൂണിത്തുറ ഏരൂർ രേവതി ഭവനിൽ വിനീത് (31) എന്നിവരാണ് അപകടത്തിൽപ്പെട്ടത്.തിങ്കളാഴ്ച രാത്രി എട്ടോടെയായിരുന്നു അപകടം. കൊല്ലത്ത് നിന്ന് സാനിറ്റൈസറുമായി അരൂരിലേക്ക് പോയ വാഹനമാണ് മട്ടാഞ്ചേരി പാലത്തിനും പോപ്പി പാലത്തിനും ഇടയിൽ അപകടത്തിൽപ്പെട്ടത്. പ്രദേശത്ത് കനാൽ നവീകരണവും പുതിയ പാലം നിർമ്മാണവും നടക്കുന്നതിന്റെ ഭാഗമായി റോഡിൽ കൂട്ടിയിരുന്ന മണൽ കൂനയിൽ തട്ടി വാഹനം കനാലിലേക്ക് വീഴുകയായിരുന്നു. കനാലിൻറെ നടുവിലേക്ക് വീണ വാഹനം പൂർണമായും മുങ്ങി.സമീപവാസി കൊമരോത്ത് ഹൗസിൽ സെബാസ്റ്റ്യന്റെ സമയോചിത ഇടപെടലിനെ തുടർന്നാണ് വാഹനത്തിലുള്ളവരെ രക്ഷിക്കാനായത്. അപകടത്തിന്റെ ശബ്ദം കേട്ട് പുറത്തിറങ്ങിയ ഉടൻ തന്നെസെബാസ്റ്റ്യൻ കനാലിൽ ചാടി വാഹനത്തിന്റെ ഡോർ തുറന്നു. തുടർന്ന് ഡ്രൈവർ നീന്തി കരക്കെത്തി. നീന്തൽ അറിയാത്ത സഹായിയെ സെബാസ്റ്റ്യൻ വാഹനത്തിന്റെ മുകളിൽ കയറ്റി ഇരുത്തി, അഗ്നിരക്ഷാ സേനയെത്തിയാണ് ഇയാളെ കരയ്ക്കെത്തിച്ചത്. പ്രദേശത്ത് വെളിച്ചക്കുറവുള്ളതിനാൽ മണൽകൂന ഡ്രൈവറുടെ ശ്രദ്ധയിൽപ്പെടാതിരുന്നതാണ് അപകടത്തിന് കാരണം .