 മഴക്കാലപൂർവ്വ മുന്നൊരുക്കങ്ങൾ പാളുന്നു

ആലപ്പുഴ: കൊവിഡ് ഭീതി അനുദിനം പെരുകുന്നതിനിടെ പകർച്ചവ്യാധി ഭീഷണിക്കു കൂടി കവചമുണ്ടാക്കേണ്ട അവസ്ഥയിലായി ജില്ല. മഴക്കാല പൂർവ്വ മുന്നൊരുക്കങ്ങളൊന്നും ഇതുവരെ എങ്ങുമൊട്ട് എത്തിയതുമില്ല.

ഇത്തവണ മേയ് 15ന് മുമ്പ് മുന്നൊരുക്കങ്ങൾ പൂർത്തീകരിക്കാനായിരുന്നു തീരുമാനം. എന്നാൽ കൊവിഡിനെ തുടർന്ന് പ്രവർത്തനങ്ങൾ ഇഴഞ്ഞു. മഴക്കാല പൂർവ്വ ശുചീകരണത്തിന്റെ ഭാഗമായുള്ള പ്രവൃത്തികൾ തൊഴിലുറപ്പ് പദ്ധതിയിൽപ്പെടുത്തി മുൻഗണനാക്രമം അനുസരിച്ച് പട്ടിക തയ്യാറാക്കി ഉടൻ പൂർത്തിയാക്കണമെന്നാണ് സർക്കാർ നിർദേശം. പ്രതിരോധ പ്രവർത്തനങ്ങൾക്ക് ആരോഗ്യ വകുപ്പും പഞ്ചായത്തു ഭരണസമിതികളും വേണ്ടത്ര താത്പര്യം കാട്ടുന്നില്ലെന്നും ആക്ഷേപമുണ്ട്.

പല പഞ്ചായത്തുകളിലും വാർഡുതല സാനിട്ടേഷൻ കമ്മിറ്റികൾ പ്രവർത്തന സജ്ജമല്ല. വാർഡ് മെമ്പർ ചെയർമാനും ഹെൽത്ത് ഇൻസ്പെക്ടർ കൺവീനറുമായുള്ള വാർഡുതല സാനിട്ടേഷൻ കമ്മിറ്റികൾ ഉണർന്ന് പ്രവർത്തിച്ചാൽ പകർച്ചവ്യാധികളെ ഒരു പരിധിവരെ തടഞ്ഞു നിറുത്താനാകും. എലിപ്പനി, ഡെങ്കിപ്പനി, പകർച്ചപ്പനി, ഛർദ്ദി, മഞ്ഞപ്പിത്തം, അതിസാരം തുടങ്ങിയ രോഗങ്ങളാണ് മഴക്കാലത്ത് ജില്ലയിൽ പടരുന്നത്. ജപ്പാൻജ്വരം, ചിക്കുൻഗുനിയ തുടങ്ങിയ കൊതുക്ജന്യ രോഗങ്ങളുടെ ഭീഷണിയും ജില്ലയ്ക്കുണ്ട്. മാലിന്യ നിക്ഷേപം മൂലം ജലസ്രോതസുകൾ മലിനമാകുന്നത് ജല, കൊതുകുജന്യ രോഗങ്ങൾക്ക് അനുകൂല സാഹചര്യമൊരുക്കും.
വ്യക്തി ശുചിത്വവും പരിസര ശുചിത്വവും ഉറപ്പാക്കാനുള്ള ബോധവത്കരണവും മാലിന്യം നീക്കം ചെയ്യുന്ന പ്രവർത്തനങ്ങളും ഒരിടത്തും നടക്കുന്നില്ല. തദ്ദേശ സ്വയംഭരണ സ്ഥാപനങ്ങൾ മഴക്കാല രോഗങ്ങളുടെ പ്രതിരോധ പ്രവർത്തനം കാര്യക്ഷമമാക്കിയില്ലെങ്കിൽ പകർച്ചവ്യാധികൾ പിടിമുറുക്കിയേക്കാം. ജില്ലയിലെ 73 ഗ്രാമപഞ്ചായത്തുകളിലും ആറ് നഗരസഭകളിലും ശുചീകരണ പ്രവർത്തനങ്ങൾ നടത്താൻ ഒരോ വാർഡിനും 25,000 രൂപ വീതമാണ് സർക്കാർ അനുവദിച്ചത്. ഇതിൽ ദേശീയ ആരോഗ്യ മിഷൻ (എൻ.എച്ച്.എം), ശുചിത്വമിഷൻ എന്നിവ 10,000 രൂപ വീതം നൽകും. ബാക്കി 5000 രൂപ തദ്ദേശ സ്ഥാപനങ്ങൾ തനത് ഫണ്ടിൽ നിന്ന് ചെലവഴിക്കാനാണ് സർക്കാർ നിർദ്ദേശം.

.....................................

 25,000 രൂപ: ഓരോ വാർഡിനും അനുവദിച്ച തുക

 5,000 രൂപ: ചെലവഴിക്കേണ്ട തനത് ഫണ്ട്

..........................................

 പ്രവൃത്തികൾ

കൊതുക്, എലി നശീകരണ പ്രവർത്തനങ്ങൾ, ജലസ്രോതസുകളുടെ ക്‌ളോറിനേഷൻ, ബോധവത്കരണ ലഘുലേഖകൾ വീടുകളിൽ എത്തിക്കൽ, പ്രതിരോധ മരുന്ന് വിതരണം, മാലിന്യം നീക്കം ചെയ്യൽ, ഹോട്ടലുകൾ, കടകൾ എന്നിവിടങ്ങളിലെ ശുചിത്വം ഉറപ്പാക്കൽ, റോഡുകളിലും പൊതു സ്ഥലങ്ങളിലും വെള്ളം കെട്ടിക്കിടക്കുന്നത് ഒഴിവാക്കൽ, മൈക്ക് പ്രചാരണം എന്നിവയാണ് പ്രധാന പ്രവർത്തനങ്ങൾ.

.........................................

പ്രവർത്തനങ്ങൾക്കുള്ള ഫണ്ട് രണ്ട് ദിവസത്തിനുള്ളിൽ തദ്ദേശ സ്വയംഭരണ സ്ഥാപനങ്ങൾക്ക് കൈമാറും

(ദേശീയ ആരോഗ്യ മിഷൻ അധികൃതർ)