മാവേലിക്കര: ജനകീയ സമിതിയുടെ നേതൃത്വത്തിൽ അടിസ്ഥാന ഭക്ഷ്യ സുരക്ഷ ലക്ഷ്യമാക്കി നടപ്പാക്കുന്ന പത്ത് മൂട് കപ്പയും ഒരു മൂട് കാന്താരിയും പദ്ധതിയുടെ സംസ്ഥാനതല ഉദ്ഘാടനം സജി ചെറിയാൻ എം.എൽ.എ നിർവഹിച്ചു. ശ്രീശുഭാനന്ദ ആശ്രമത്തിൽ നടന്ന ചടങ്ങിൽ ജനകീയ സമിതി സംസ്ഥാന ജനറൽ സെക്രട്ടറി അനി വർഗീസ് അദ്ധ്യക്ഷനായി. ആശ്രമത്തോട് ചേർന്നുള്ള നാല് ഏക്കർ സ്ഥലത്തും എല്ലാ ശാഖകളിലും വീടുകളിലും ഈ പദ്ധതി നടപ്പിലാക്കുമെന്ന് ശുഭാനന്ദാശ്രമം മഠാധിപതി ദേവാനന്ദ ഗുരു കപ്പത്തടിയും കാന്താരി തൈയും ഏറ്റുവാങ്ങിക്കൊണ്ട് നടത്തിയ അനുഗ്രഹ പ്രഭാഷണത്തിൽ പറഞ്ഞു. ആശ്രമം ജനറൽ സെക്രട്ടറി സ്വാമി ഗീതാനന്ദൻ, ജോർജ്ജ് തഴക്കര , ജനറൽ കൺവീനർ സന്തോഷ് കൊച്ചുപറമ്പിൽ, സംസ്ഥാന കോർഡിനേറ്റർ ഡോ.ജോൺസൺ.വി.ഇടിക്കുള, ജോസഫ്കുട്ടി കടവിൽ, എന്നിവർ സംസാരിച്ചു. മെയ് 28ന് ജില്ലാത ഉദ്ഘാടനങ്ങൾ പൂർത്തിയാകും. വീടുകൾ, സ്ഥാപനങ്ങൾ, ആരാധനാലയങ്ങൾ, വിദ്യാഭ്യാസ സ്ഥാപനങ്ങൾ തുടങ്ങിയ സ്ഥലങ്ങളിലും പദ്ധതി നടപ്പാക്കും. സ്വന്തമായി സ്ഥലം ഇല്ലാത്തവർക്ക് പങ്കാളിത്ത കൃഷി ചെയ്യുന്നതരത്തിലാണ് പദ്ധതി നടപ്പാക്കുന്നത്.