മാവേലിക്കര: ലോക്ക് ഡൗൺ കാരണം പ്രതിസന്ധിയിലായ കേരളത്തിലെ വ്യാപാരികൾക്കായി രക്ഷാ പാക്കേജ് പ്രഖ്യാപിക്കണമെന്ന് ആവശ്യപ്പെട്ട് വ്യാപാരി വ്യവസായി കോൺഗ്രസ് സർക്കാർ ഓഫീസുകൾക്ക് മുന്നിൽ നടത്തുന്ന സമരത്തിന്റെ ഭാഗമായി നാളെ രാവിലെ 10.30ന് മാവേലിക്കര നിയോജക മണ്ഡലം കമ്മിറ്റിയുടെ നേതൃത്വത്തിൽ താലൂക്ക് ഓഫീസിനു മുന്നിൽ ധർണ നടത്തും. ഡി.സി.സി. വൈസ് പ്രസിഡന്റ് അഡ്വ.കെ.ആർ.മുരളീധരൻ ഉദ്ഘാടനം ചെയ്യും. നിയോജക മണ്ഡലം കൺവീനർ മാത്യു കണ്ടത്തിൽ അദ്ധ്യക്ഷനാവും. കടകളുടെ ആറുമാസത്തെ വാടക ഒഴിവാക്കുക, രണ്ടുലക്ഷം രൂപവരെ ഈടില്ലാതെ ഒരു കൊല്ലത്തെ മൊറട്ടോറിയത്തോടെ ബാങ്ക് വായ്പ അനുവദിക്കുക തുടങ്ങിയ ആവശ്യങ്ങളുന്നയിച്ചാണ് സമരം നടത്തുന്നതെന്ന് ജനറൽ സെക്രട്ടറി മനോജ് ഓലകെട്ടിയമ്പലം അറിയിച്ചു.