ന്യൂഡൽഹി: ജമ്മു കാശ്​മീരിൽ 4 ജി ഇന്റർനെറ്റ്​ സേവനം പുനഃസ്ഥാപിക്കണമെന്ന ഹർജികളിൽ ഉന്നതാധികാര സമിതി രൂപീകരിക്കാൻ നിർദേശിച്ച്​ സുപ്രീംകോടതി. ആഭ്യന്തര മന്ത്രാലയം സെക്രട്ടറി അദ്ധ്യക്ഷനായ സമിതിയിൽ വാർത്താ വിനിമയ മന്ത്രാലയം സെക്രട്ടറി, ജമ്മു കാശ്​മീർ ചീഫ്​ സെക്രട്ടറി എന്നിവർ ഉൾപ്പെടും. സമിതി റിപ്പോർട്ട് കിട്ടിയ ശേഷം മാത്രമാകും കേസിൽ തുടർ നടപടി.

ജമ്മു കാശ്​മീരിലെ സുരക്ഷയെക്കുറിച്ചാകും സമിതി വിലയിരുത്തുക. ഇതിനൊപ്പം 4ജി ഇന്റർനെറ്റ്​ പുനഃസ്ഥാപിക്കണമെന്ന്​ ഹർജിക്കാരുടെ ആവശ്യവും പരിഗണിക്കണം.

ജസ്റ്റിസ്​ എൻ.വി. രമണ, ആർ. സുഭാഷ്​ റെഡ്ഡി, ബി.ആർ. ഗവായ്​ എന്നിവരടങ്ങുന്ന ​മൂന്നംഗ ബെഞ്ചിന്റേതാണ് ഉത്തരവ്.

കാശ്മീരിൽ ഇപ്പോഴും ഭീകരന്മാരുണ്ടെന്നും അതിനാൽ 4ജി അനുവദിക്കരുതെന്നുമാണ് കേന്ദ്ര നിലപാട്. നിലവിൽ ലഭിക്കുന്ന 2ജി ഇൗ ലോക്ക്​ ഡൗൺ സമയത്ത്​ പര്യാപ്​തമല്ലെന്ന്​ കാട്ടി ഫ്രീഡം ഫോർ മീഡിയ പ്രൊഫഷണൽസ്​ (എഫ്​.എം.പി), ശുഐബ്​ ഖുറേഷി, ​പ്രൈവറ്റ്​ സ്​കൂൾ അസോസിയേഷൻ ജമ്മുകാശ്​മീർ എന്നിവരാണ്​ ഹർജി സമർപ്പിച്ചത്​.