ന്യൂഡൽഹി :കൊവിഡ് പ്രതിരോധ ഫണ്ടിലേക്ക്​ കൂടുതൽ പണം നൽകാൻ ചെലവ് ചുരുക്കലുമായി രാഷ്​ട്രപതി രാംനാഥ്​ കോവിന്ദ്​. യാത്രകൾ, ഔദ്യോഗിക വിരുന്നുകൾ എന്നിവ ഗണ്യമായി കുറയ്ക്കും.

ആഡംബര വാഹനം ഉപയോഗിക്കില്ല. സാധാരണ ഒൗദ്യോഗിക പരിപാടികൾക്കായി പത്ത് കോടിയോളം രൂപ വിലയുള്ള ആഡംബരകാറിലാണ് രാഷ്ട്രപതിയെത്താറുള്ളത്. രാഷ്​ട്രപതി ഭവനിൽ ഓഫീസ്​ സ്​റ്റേഷണറി സാധനങ്ങൾ, ഇന്ധനം എന്നിവയുടെ ഉപയോഗം കുറയ്ക്കും. പരിപാടികളിൽ പുഷ്പാലങ്കാരം, വിരുന്നൊരുക്കൽ എന്നിവ നിജപ്പെടുത്തും. രാഷ്ട്രപതിഭവനിൽ അടുത്ത ഒരു വ‌ർഷത്തേക്ക് പുതിയ നിർമ്മാണപ്രവർത്തനങ്ങളില്ല.

സ്വാശ്രയ ഇന്ത്യയെന്ന സർക്കാരി​​ന്റെ ആശയം സാക്ഷാത്കരിക്കുന്നതിനും പകർച്ചവ്യാധിയോട് പോരാടുന്നതിനുമായി എല്ലാവരും കൈകോർക്കണം. രാജ്യത്തി​​ന്റെ വികസനത്തിനും അഭിവൃദ്ധിക്കും വേണ്ടിയുള്ള ചെറുതും പ്രധാനപ്പെട്ടതുമായ സംഭാവനയാണ്​ ചെലവ് ചുരുക്കൽ നടപടിയെന്നും രാഷ്​ട്രപതി പ്രസ്​താവനയിൽ പറഞ്ഞു.

ശമ്പളവും നൽകി

ഒരു വർഷത്തേക്ക്​ ​രാഷ്ട്രപതിയുടെ ശമ്പളത്തിന്റെ 30 ശതമാനം കൊവിഡ്​ പ്രതിരോധ ഫണ്ടിലേക്ക് നൽകും. മാർച്ച്​ മാസത്തെ ശമ്പളം മുഴുവനായും പ്രധാനമന്ത്രിയുടെ പി.എം കെയേഴ്​സിലേക്ക്​ നൽകിയിരുന്നു. രാഷ്ട്രപതി ഭവൻ ജീവനക്കാരുടെ വകയായി 18 ലക്ഷം രൂപയും സംഭാവനയായി നൽകി.