ന്യൂഡൽഹി: ഭോപ്പാലിൽ നിന്ന്​ ഡൽഹിയിലേക്ക് നാലു പേർ അടങ്ങുന്ന കുടുംബത്തിന് യാത്രചെയ്യാൻ

180 സീറ്റി​ന്റെ വിമാനം വാടകക്കെടുത്ത്​ വ്യവസായിയും അബ്കാരിയുമായ ജഗദീഷ്​ അറോറ. മകൾക്കും രണ്ടു പേരക്കുട്ടികൾക്കും അവരുടെ ആയക്കും യാത്രചെയ്യാനാണ് ഡൽഹിയിൽ നിന്ന് എയർബസ്​ എ 320 വിമാനം വാടകയ്ക്ക് എടുത്തത്​.

9.30 ന്​ ഡൽഹിയിൽനിന്ന്​ പുറപ്പെട്ട വിമാനം 10.30ഓടെ ഭോപ്പാലിലെത്തി. അവിടെ നിന്നും​ ജഗദീഷി​ന്റെ മകളെയും പേരക്കുട്ടികളെയും കൂട്ടി​ 11.30 ഓടെ വിമാനം തിരിച്ച്​ ഡൽഹിയിലെത്തി. മറ്റു യാത്രക്കാർക്ക്​ ഒപ്പം സഞ്ചരിച്ചാൽ കൊവിഡ്​ ബാധിക്കുമെന്നും സുരക്ഷിതത്വം ഉറപ്പാക്കാൻ കഴിയില്ലെന്നും കരുതിയാണ് മദ്യവ്യവസായി ഇത്രയും വലിയ തുക വിമാനയാത്രക്കായി മുടക്കിയത്.

മണിക്കൂറിൽ അഞ്ച് മുതൽ ആറുലക്ഷം വരെയാണ്​ എയർബസി​ന്റെ വാടക. ഭോപ്പാലിൽ നിന്ന്​ ഡൽഹിയിലേക്കുള്ള യാത്രക്കായി ജഗദീഷ്​ 25 മുതൽ 50 ലക്ഷം വരെ മുടക്കിയതായാണ്​ വിവരം. ആദ്യം വിമാനം വാടകക്കെടുത്ത കാര്യം നിഷേധിച്ചെങ്കിലും പിന്നീട്​ തങ്ങളുടെ സ്വകാര്യകാര്യമാണെന്നും വ്യവസായി പ്രതികരിച്ചു.