കടയിരുപ്പ്: എഴിപ്രം പാടശേഖരത്തിൽ യുവാക്കളുടെ കൃഷിയ്ക്ക് നൂറു മേനി വിളവ്. ഇവർ നടത്തിയ തരിശ് നെല്കൃഷിയുടെ കൊയ്ത്തുത്സവം പഞ്ചായത്ത് പ്രസിഡന്റ് കെ.കെ രാജു ഉദ്ഘാടനം ചെയ്തു.പഞ്ചായത്തും കൃഷി ഭവനും,സിന്തൈ​റ്റ് കമ്പനിയുടെ സി.വി.ജെ ഗ്രാമോദയ, പാടശേഖരസമിതി എന്നിവയുടെ സംയുക്ത സഹകരണത്തോടെയാണ് വിവിധ കർഷകരുടെ ഉടമസ്ഥതയിൽ ഉള്ളതും 20 വർഷത്തോളമായി തരിശായി കിടന്നിരുന്നതുമായ 25 ഏക്കറോളം പാടശേഖരത്തിൽ വിത്തിറക്കിയത്.ഏഴിപ്രം പാടശേഖര സമിതി യുടെ നേതൃത്വത്തിൽ റോജേഷ് തോമസ്,റിട്ടു, ജിമ്മിച്ചൻ, അലിസ്​റ്റർ ജിമ്മി, മേരിക്കുട്ടി എന്നീ യുവാക്കളാണ് തരിശ് കൃഷി ഏറ്റെടുത്തു നടത്തിയത്. ചടങ്ങിൽ ഐക്കരനാട് കൃഷി ഓഫീസർ അഞ്ജു പോൾ, സിന്തൈ​റ്റ് എം.ഡി വിജു ജേക്കബ് തുടങ്ങിയവർ സംബന്ധിച്ചു.