നെടുമ്പാശേരി: ലോക്ക്ഡൗൺ ഇളവിന്റെ പശ്ചാത്തലത്തിൽ സംസ്ഥാന പൊതുമേഖലാ സ്ഥാപനമായ കാംകോ (കേരള അഗ്രോ മെഷീനറി കോർപ്പറേഷൻ) ടില്ലറുകളുടെ അന്തർ സംസ്ഥാന കയറ്റുമതി പുനരാരംഭിച്ചു. ഇന്നലെ ത്രിപുരയിലേക്ക് 400 ടില്ലറുകളും അനുബന്ധ ഉപകരണങ്ങളും ഏതാനും കൊയ്ത്തുയന്ത്രങ്ങളും ഗുഡ്സ് ട്രെയിനിൽ കയറ്റിഅയച്ചു.

തിങ്കളാഴ്ച 621 ടില്ലറുകളും അനുബന്ധ ഉപകരണങ്ങളും പാലക്കാട് നിന്ന് ഗോഹാട്ടിയിലേക്കും അയക്കും. വരും ദിവസങ്ങളിൽ ഛത്തീസ്ഗഡ്, ഒഡീഷ, ബംഗാൾ എന്നിവിങ്ങളിലേക്കും അയക്കുമെന്ന് കാംകോ ചെയർമാൻ പി. ബാലചന്ദ്രൻ, മാനേജിംഗ് ഡയറക്ടർ കെ.പി. ശശികുമാർ എന്നിവർ പറഞ്ഞു. കാർഷിക യന്ത്രങ്ങളുടെ ഇറക്കുമതി കുറയുമ്പോൾ ഉണ്ടാകാനിടയുള്ള പ്രതിസന്ധി മറികടക്കാൻ ആഭ്യന്തര ഉത്പാദനം വർദ്ധിപ്പിക്കും. അത്താണി, കഞ്ചിക്കോട്, മാള, കളമശേരി യൂണിറ്റുകളിൽ ഉത്പാദനം പുനരാരംഭിച്ചിട്ടുണ്ട്.