നെടുമ്പാശേരി: കുട്ടിയുടെ പാസ്പോർട്ട് കാലാവധി അവസാനിച്ചതറിയാതെ നാട്ടിലേക്ക് വരുന്നതിനായി വിമാനത്താവളത്തിലെത്തിയ പ്രവാസി കുടുംബത്തിന് ബഹ്റിൻ സോഷ്യൽ ഫോറത്തിന്റെയും അൻവർ സാദത്ത് എം.എൽ.എയുടെയും ഇടപെടൽ അവസാന നിമിഷം അനുഗ്രഹമായി.

പത്തനംതിട്ട കോഴഞ്ചേരി കല്ലുറുമ്പിൽ വീട്ടിൽ അനിൽ തോമസിനും കുടുംബത്തിനുമാണ് പരീക്ഷണം നേരി​ടേണ്ടി​ വന്നത്. 17 വർഷത്തോളമായി ബഹ്റിനിലാണ് അനി​ൽ തോമസ്. ഭാര്യയും രണ്ട് മക്കളും ഒപ്പമുണ്ട്. ഇന്നലെ രാത്രി നെടുമ്പാശേരിയിലെത്തി​യ വിമാനത്തിലെ യാത്രക്കാരായിരുന്നു നാല് പേരും.

ബഹ്റിൻ വിമാനത്താവളത്തിൽ എമിഗ്രേഷൻ പരിശോധനക്കി​ടെയാണ് മൂത്തമകൻ യോഹ (10)ന്റെ പാസ്പോർട്ട് കാലാവധി കഴിഞ്ഞ ഏപ്രിൽ ഏഴിന് അവസാനിച്ചെന്നറിഞ്ഞത്. കൊച്ചിയിലെ എയർ ഇന്ത്യ അധികൃതരും എമിഗ്രേഷൻ വിഭാഗവും അനുവദിച്ചാൽ യാത്ര അനുവദിക്കാമെന്ന നിലപാടായിരുന്നു ബഹ്റിനിലെ എയർ ഇന്ത്യ വിമാന ജീവനക്കാർക്ക്. കേരള സോഷ്യൽ ഫോറം വഴി​ അൻവർ സാദത്തിനെ ബന്ധപ്പെട്ടു എം.എൽ.എ കൊച്ചിയിലെ ഇരുവിഭാഗത്തിലെയും ഉദ്യോഗസ്ഥരുമായി സംസാരിച്ചാണ് അവസാന നിമിഷം അനിലിനും കുടുംബത്തിനും യാത്ര സൗകര്യം ഒരുങ്ങിയത്.