തൃപ്പൂണിത്തുറ ശ്രീനാരായണ വിദ്യാപീഠത്തിൽ ഓൺലൈൻ ക്ളാസുകൾ ഉഷാർ

തൃപ്പൂണിത്തുറ: സ്കൂളുകൾ തുറന്നില്ലെങ്കിലും രാവിലെ പഠനമുറികളിൽ ശ്രീനാരായണ വിദ്യാപീഠത്തിലെ ടീച്ചറും കുട്ടികളും ഹാജരുണ്ട്. ലോക്ക് ഡൗണിൽ നഷ്ടപ്പെടുന്ന അദ്ധ്യയന ദിനങ്ങൾ ഓൺലൈൻ ക്ലാസുകളിലൂടെ വീണ്ടെടുത്ത് പുത്തൻ മാതൃക സൃഷ്ടിക്കുകയാണ് തൃപ്പൂണിത്തുറ ശ്രീനാരായണ വിദ്യാപീഠം. ജില്ലയിൽ ആദ്യമായി ഓൺലൈൻ പഠനം ആരംഭിച്ച സ്കൂളുകളി​ലൊന്നാണ് വിദ്യാപീഠം.

ഏപ്രിൽ എട്ടു മുതൽ 9,10,12 ക്ളാസുകളി​ലെ മുന്നൂറോളം വിദ്യാർത്ഥികൾക്കായി ആരംഭിച്ച പഠനം സമ്പൂർണ വിജയകരമായി ഒരു മാസം പിന്നിട്ടു. രാവിലെ ഒൻപതര മുതൽ പന്ത്രണ്ട് വരെയാണ് ക്ലാസ്. കുട്ടികൾക്കും സംഗതി ഇഷ്ടപ്പെട്ടതായി അദ്ധ്യാപകർ പറയുന്നു.

ലോക്ക് ഡൗൺ നീണ്ടാൽ ഒന്നാം ക്ലാസ് മുതൽ ഓൺലൈൻ ക്ലാസുകൾ ആരംഭിക്കാനുള്ള സംവിധാനവും സ്കൂൾ ഒരുക്കി കഴിഞ്ഞു.

26 ക്ളാസുകളാണ് ഇവി​ടെയുള്ളത്. എല്ലാം ഡി​ജി​റ്റൽ സ്മാർട്ട് ക്ളാസുകളായതി​നാൽ ഓൺ​ലൈനി​ലേക്ക് മാറുന്നതും എളുപ്പമായി​രുന്നു. ലേണിംഗ് മാനേജ്മെന്റ് സി​സ്റ്റം (എൽ.എം.എസ്) ഉപയോഗി​ച്ചാണ് പഠനം.

സി​ലബസ് കുട്ടി​കൾക്ക് നേരത്തേ ഡൗൺ​ലോഡ് ചെയ്യാം. വാട്ട്സ് ആപ്പ് ഗ്രൂപ്പി​ലൂടെ ടൈംടേബി​ൾ നേരത്തേ നൽകും.ക്ളാസ് ആരംഭി​ക്കുമ്പോഴോ അതി​നു മുമ്പോ കുട്ടി​കൾക്ക് പാഠഭാഗം നോക്കുകയും ആകാം. കമ്പ്യൂട്ടറോ വെബ് കാമറ ഘടി​പ്പി​ച്ച സ്മാർട്ട് ഫോണോ ഉപയോഗി​ക്കണം. ടീച്ചറുമായി​ ആശയവി​നി​മയവും നടത്താം. കാമറ പ്രത്യേകം ഇല്ലെങ്കി​ലും കുഴപ്പമി​ല്ല. ക്ളാസ് മി​സായാലും കുഴപ്പമി​ല്ല. റെക്കോർഡ് ചെയ്യുന്നതി​നാൽ പി​ന്നീടും റെഫർ ചെയ്യാം. പക്ഷേ കുട്ടി​കൾ മുങ്ങി​യാൽ ടീച്ചർക്ക് മനസി​ലാകും. രണ്ട് മൂന്നു ക്ളാസുകൾ കണ്ടി​ല്ലെങ്കി​ൽ രക്ഷകർത്താവി​നെ വി​ളി​ച്ചു ചോദി​ക്കുകയും ചെയ്യുന്നുണ്ട്.

• സമ്പൂർണ വി​ജയം

ഒരു മുന്നൊരുക്കവും ഇല്ലാതെയാണ് ഓൺ​ലൈൻ ക്ളാസുകൾ ആരംഭി​ച്ചത്. പക്ഷേ പൂർണ വി​ജയമാണ്. ആദ്യം തന്നെ അദ്ധ്യാപകർക്ക് ഓൺലൈനിൽ പരിശീലനം നൽകി. രക്ഷകർത്താക്കളും പിന്തുണയുമായി ഒപ്പം നിന്നു.

എം.എൻ ദിവാകരൻ, സ്കൂൾ മാനേജർ

എം.ആർ രാഖി പ്രിൻസ്, പ്രിൻസിപ്പൽ