ആലുവ: തൊഴിൽരഹിതരായ യുവാക്കൾക്ക് മത്സ്യക്കൃഷി നടത്തുന്നതിന് ഭൂമി സൗജന്യമായി വിട്ടുനൽകി ചലച്ചിത്രനടൻ ടിനിടോം മാതൃകയായി. ആലുവ പട്ടേരിപ്പുറത്തെ 13 സെന്റ് സ്ഥലമാണ് അയൽവാസികളായ മൂന്ന് സഹോദരങ്ങൾക്ക് വിട്ടുനൽകിയത്. കട്‌ല, രോഹു, അനാബ, പീലി, വാഹ തുടങ്ങിയ മത്സ്യങ്ങളാണ് വളർത്തുന്നത്‌.
ബിരുദാനന്തരബിരുദം പൂർത്തിയാക്കിയ സനൽരാജാണ് രണ്ട് സഹോദരങ്ങൾക്കൊപ്പം മത്സ്യക്കൃഷിക്കിറങ്ങിയിരിക്കുന്നത്. ചലച്ചിത്ര നടൻ ജോയി മാത്യു തന്റെ ഭൂമി കൃഷിചെയ്യാൻ സൗജന്യമായി വിട്ടുകൊടുത്ത വാർത്തയാണ് തനിക്കിതിന് പ്രചോദനമായതെന്ന് ടിനി ടോം പറഞ്ഞു. കൃഷിചെയ്യാൻ മുന്നോട്ടുവന്നവർക്ക് സൗജന്യമായി ഭൂമിവിട്ടു നൽകിയ ടിനി ടോമിന്റെ മാതൃക മറ്റ് പലരും പിന്തുടരണമെന്ന് മത്സ്യക്കൃഷിയുടെ ഉദ്ഘാടനം നിർവഹിച്ച് മന്ത്രി വി.എസ്. സുനിൽകുമാർ പറഞ്ഞു. അൻവർ സാദത്ത് എം.എൽ.എ, ചൂർണിക്കര ഗ്രാമപഞ്ചായത്ത് പ്രസിഡന്റ് കെ.എ. ഹാരീസ് എന്നിവരും സംബന്ധിച്ചു.